كل ما تحتاج معرفته عن الإكتئاب!!
الموضوع: كل المعلومات التي تحتاج معرفتها عن الاكتئاب.تقديم:
ديما تانسمعو هاد المصطلح جاني الاكتئاب،هدا مكتائب،نتاشرات الكآبة و زيد و زيد من المصطلحات المتنوعة ولكن واش فعلا تانعرفو اشناهوا الاكتئاب بطريقة علمية؟اشناهوما الاعراض ديالو عند الرجال و النساء؟اشناهوا التأثير ديالو على الانسان؟و ما هو الحل و العلاج ديال الاكتئاب؟
 |
| كل ما تحتاج معرفته عن الإكتئاب!! |
ما هو الإكتئاب؟
الإكتئاب هو واحد لحالة نفسية جد صعبة و معقدة و تايأثر بواحد شكل كبير على الصحة النفسية ديالك و على شعورك و احساسك و طريقة تفكيرك المهم تايثر على حياتك نفسية و الصحية و الاجتماعية و زيد و زيد و هو مشكل طبي شائع تايسبب لحزن و القلق و متاتبقاش عندك لكانة باش دير الانشطة اليومية ديالك تاتفقد الاهتمام بها تا الاحساس بالمتعة تايغيب، و الاكتئاب تايسبب واحد المجموعة من المشاكل المتنوعة سواءا العاطفية و العائلة و العملية متاتبقى عندك الكانة لتا شي حاجة و متاتقدر مزال دير والو تاتفشل فشتى المجالات،بل و صحتك كدلك تادهور هدا هو الاكتئاب المرضي اما الى مكانتش راشقة ليك واحد يومين ولا تلت يام ولا حتى سيمانة راه ماشي اكتئاب مرضي هداك غي حالة تاتجي للانسان منين تايكتر عليه ضغط و صف.
ما هي علامات الاكتئاب عند الرجل؟؟
رجال صعيب تعرف بلي عندهم اكتئاب حيت قليل فاش تايبينو مشاعرهم و متايبانش عليهم الحزن بزاف لكن فيما يلي بعض الاعراض لي يمكن تعلمك بانك عندك اكتئاب مرضي سيدي.
القلق الشديد: ديما مقلق ديما كاعي فغالب اوقاتك.
العياء الشديد:ديما تاتحس براسك عيان و عكزان و مافيك لي دير والو
مشاكل في النوم: متاتنعسش مزيان ولا تايجيك الارق بزاف
فقدان الحيوية: من بعد ماكنتي ديما حيوي و كلي طاقة ادا بك فجأة عكزان و فنيان
فقدان الثقة فالنفس: هادشي فحالة الى كنتي اصلا واتق من نفسك و من بعد حسيتي بلي صف مابقيتي قادر لا تناقش ناس لا تهدر قدامهم بحرية و زيد و زيد.
حاجة اخرى منين رجال تايولي عندهم مرض الاكتئاب تايتصرفو بشكل مغاير تماما للنساء بحيت انهم تايوليو منغامسين فلخدمة اغلب لوقت و تايولو متهورين و تايدخلو فشي رياضة ولا هواية بواحد شكل جنوني.
ما هي علامات الاكتئاب عند النساء؟؟
فقد الاهتمام بالاشياء:شي حوايج كنتي تاتبغيهم لكن صف مابقاش عندك اهتمام بيهم مزال.
البكاء بدون سبب: جالسة مابيك ما عليك تا كادمعي غا بوحدك.
الاحساس بالارهاق و التعب الشديد:ديما عيانة و مافيك لي يتحرك بواحد الدرجة مبالغ فيها.
فقدان التركيز: ماكاتقدريش مزال تركزي على الحوايج لي تاديري سواءا قرايا او انشطة اخرى.
مشاكل في النوم: متايجيكش نعاس بليل تاتبقاي غي تقلبي بلاصتك.
القلق و الانفعال: على سبة تقلقي و تبقاي دوري فعباد الله اكتر من اللزوم.
فقدان الوزن: تاضعافي بواحد شكل كبير ففترة صغيرة بزاف.
تقلب في المزاج: تقلبات و تحولات حادة و قوية تاتكوني فحال تا كاتولي فحال بشكل مفاجئ.
التفكير في الموت: تاتولي باغا توضعي حد لحياتك و تفكري فالانتحار.
ما هي أسباب الاكتئاب؟؟
الاكتئاب هو وحد المرض معقد و صعيب تعرف الاسباب ديالو بدقة لاحقاش كاينين بزاف ديال العوامل لي تايسببوه فحال العامل الوراثي يعني الجينات لي نقلوها ليك واليديك و كدلك تقلبات الحياة او وفاة شخص عزيز او فقدان شيء غالي و ثمين و زيد و زيد غي لي خاصكم تعرفو بلي هادشي كامل تايوقع فدماغ حيت هو لي مسؤول على الاحاسيس و الشعور و المزاج و كلشي عن طريق مجموعة من المواد البيوكيميائية (مواد كيميائية مرتبطة بكائن حي) يعني نقص او زيادة فاحداها يقدر يسبب مشكل صحي كالاكتئاب بلاما نهرس ليكم راسكم بهاد المواد ندوزو للمفيد و نقولو لحوايج لي يقدرو يخربقو هاد المواد البيوكيميائية و الخلايا الدماغية.
الاساءة: جميع انواع الاساءة فحال الاساءة البدنية او العاطفية او الجنسية تقدر تأدي للاكتئاب
الخصام و النزاع: مع العائلة او الاصدقاء و بل حتى مع النفس.
فقدان الاحباء: منين تاتفقد انسان عزيز على قلبك بزاف او تايموت ليك يقدر يأدي للاكتئاب.
التحولات الكبرى: فحال فقدان وظيفة او مصدر دخل و الطلاق و ما الى دلك من الاحداث الكبرى .
مشاكل نفسية: فحال العزلة الاجتماعية و الوحدانية و غياب العلاقات و الصداقات.
امراض خطيرة: الانسان منين تايكتاشف بلي عندو شي مرض خطير او مزمن يقدر يطيح فخانة الاكتئاب.
تعاطي المخدرات: المبوقين الله يعفو عليهم تايسحاب ليهم واش بداكشي غاينسى المشاكيل و المعانات ولكن مباشرة من بعد تايسحى تايحس بالاكتئاب ديال بصح.
كيف يأثر الاكتئاب على الشخص؟؟
زيادة او نقصان الوزن: كاين جوج حالة يال الانسان تايفقد الشهية بمرة و تايضعاف بزاف و بالتالي هادشي تاضر صحة القلب و تايأثر على الخصوبة و يسبب تعب و الارهاق او تايولي تايستمتع بالماكلة و تاتولي شهيتو مفتوحة تايبقى ياكل ياكل تا يتكوفل و نتوما عارفين بلي لغلض اكبر مشكل فهاد العالم الله يحفظ ههه تانقول هكا حيت فغيمون كان معقدني المهم من بعد نشارك معاكم قصتي ديال فقدان الوزن و كاع المعلومات العلمية وراء فقدان الوزن انشاء الله.
الالم: الاحساس بالالم فمناطق مختلفة في الجسم فحال المفاصل و العضلات و الثدي و
الصداع.
الجنس: بحيث ان الرغبة فممارسة الجنس تاتولي تقريبا منعدمة و الشهوة كاتقل بواحد الشكل رهيب و تا الاستمتاع و الرعشة الجنسية تاتكون اقل متعة بكثير عن السابق.
المناعة: الاكتئاب كايأثر على المناعة بشكل كبير بزاف يعني كاتولي معرض بشدة للامراض.
النوم: تايولي غير منتظم و تايجيك الارق.
الهضم: غالبا ما المكتأبين تايكون عندهم مشاكل فالهضم و المعدة و القولون العصبي(المصران الغليض) و الامساك او الاسهال و القيء كدلك.
ما هو حل الاكتئاب افضل علاج له؟؟
بالنسبة ليا الشباب انا تانكره شي حاجة سميتها دوا نهائيا حيت ديما كاينين بدائل طبيعية و اعشاب طبيعية طب البديل كيما تانقولو الدواء الكيميائي ماتستعملوه تاتوصل فيكم لعظم كيفما تانقولو. اذا انا ماغانعطيكمش عنا ادوية او وصفات ولكن انعطيكم طرق و حلول عملية :
روتين يومي: خاص وقتك كامل يكون عامر ديما عندك مايدار اكبر مشكل هو جالس ماتادير والو خيت تاتعطي فرصة لدماغك يبقى يتفكر المشاكيل ووالصداعات و زيد و زيد عمر وقتك خدمة و رياضة و نشاطات و كون قوي انت تقدر تعالج راسك براسك كلشي كاين فمخك من بعد ندير ليكم موضوع على قوة العقل.
الاهداف: خاض يكون عندك اهداف يومية و على المدى القريب و حتى البعيد مثلا انا فيامات القرايا تايكونو عندي شغالات خصني نديرهم فالقرايا و حوايج اخرين اجتماعين و الاصدقاء و زيد و زيد و فصيف لخدمة قراءة رياضة مطالعة و زيد و زيد هادشي يوميا عاد الاهداف على المدى البعيد فحال بغيت نشد لباك ديالي بالقد و القد بغيت الاجازة فتلت سنين يعني اهداف واضحة ماشي بغيت نولي لاباس عليا و شحالاوا بغيتي ههه
الرياضة: منين تاتسالي من حصة الرياضة تايتفرزو فجسمك هرمونات غزالة بزاف دوبامين هرمون السعادة و اسيتوسين ديال الحب اياه اياه نفسو ديال الحب المهم خليط من هرمونات زوينين و الارتخاء نعام ا س و يجيك نعاس طيح دودة ههه كما ان رياضة راه مفيدة بزاف بزاف لصحة .
الاكل المتوازن: موضوع متشعب غانختاصرو بلي الى كانت ماكلتك عيانة عول على كاع الافات النفسية و الصحية و الاجتماعية.
النوم: متانقصدش تبقى ناعس ليا نهار و ماطال ولكن سبعة تسوايع كافية بزاف ولا تمنية باراك هادشي صحيا طناش لوحدة الى كترتي و ضباح ضبر راسك غي عرف الى كترتي من نعاس كاتنوض عيان و مدكدك هاحنا مابقيناش فعلاج ولكن مرض اخر هههه المهم المختصر سبعة تسوايع لماكس لوحدة
الفراغ: ماخاصوش يكون فحياتك ولا قفرتيها
الافكار السلبية: فينما كان شي قمقوم سلبي حيدو من حياتك ماتخليش تا حاجة سلبية دور بيك وسائل التواصل الاجتماعي ديالي نقيهم ماتبقاش متبع ليا الاخبار دلكوارت و الالم و الاوجاع و داك زعتر منين تحس براسك فيك هاد الاعراض طلق ليا شعبي نوض دردك عاود دردك و الفيدوات ديال ضحك باش تقمع الهرمونات ديال الضغط فحال الكرتيزول بعرمونات اخرين مزينين فحال دوبامين و استوسين و غيرهم من الهرمونات الزوينة.
المتعة: منين تكون مكتائب ماتسدش على راسك فدار عيط لشي هادوي حمق تاتعرفو و خرجو تمشاو ضحكو و نشطو ولا الى ماقدرتيش تخرج كيما قلنا تفرج ليا فشي فيلم هيندي من دوك لافلام ديال كش كش هههه ديك ضربة شهيرة ديالهم و غاتنشط او لا شي فيلم وصاوه عليك او شي رواية عجباتك و الى ماعندكش مع القرايا و هادشي كامل ربي شي مش ولا فار ولا سنجاب تهلى فيه مزيان دي لاجر و فنفس لوقت تشد ستون ههه.
كلمة ختامية:
المهم كاع لحويجات لي قلنا لفوق صالحين للمسلمين و المسيحيين و اليهود و الملحدين و كلشي هههه
دب كلامي غانوجهو للمسلمين و غانبداه بنص قرآني 《من اعرض عن ذكري فان له معيشة ضنكة》شتي ماحدنا بعاد على الله عز و جل الى و متاتلقاش واحد الملجأ روحي لي ترجع ليه في حالة الى كتآبتي حيت بقراءة القرءان و الصلاة تبتات الدراسات العلمية الحديثة انه تاتعطي واحد الطاقة ايجابية لينا كبيرة بزاف و تا منين تاتسجدو خاصكم تعرفو بلي الارض طاقتها ايجابية و بما انه كاين تجادب بين السلبي و الاجابي و بما ان طاقة الارض لايجابية كبيرة بزاف فانها تاتمتص الطاقة السلبية ديالك و بهدا فسرو ديك راحة لي كاتحس بيها من بعد الصلاة و داك الهدوء و الكالم الزوين بزاف لهدا فانحاولو نقربو من لي خلقنا ماشي حيت محتاج لينا ولكن حنا لي محتاجينو حيت التوفيق و الكمال تايجي من عندو عز و جل و حاجة اخرى ا شباب لي تانشوفها انا ضروري منها ماتبقاش دور بيك دوك الفاشلين و لي مادايرين تا وزة فحياتهم عاطيينها غي لكريتيك و الهضرة الخاويا دودودو سيرو من هاد المنبر اودي مابغيتش ندعي عليكم غي فيقو فيقو راه لوقت تاتمشى ماتبقاوش نتوما واقفين . و واحد النقطة مهمة فرقو بين الاكتئاب المرضي لي دويت عليه اليوم و بين الاكتئاب العادي لي تايجي مرة مرة لظرف من ظروف و لي لحد ديالو ماكس سيمانة الى فتيها و نتا معنكش بديتي ماتمرض حاول تخرج من ديك الحالة بواسطة دوك الطرق لي دكرت و اخر قولي الله يشافي كل المصابين بكاع الافات و دمتم سالمين و للقراءة اوفياء نتمنى عجبكم الموضوع ماتحرموناش من الاعجابات ديالكم و تعليقاتكم الى عندكم تساؤلات او تعليقات و المشاركة الى باغيين تعم الفائدة حيت حنا العرب فينا هاد الفيس تانستافدو و نخلو المعلومة عدنا يله الى اللقاء فموضوع جديد.
التسميات :
صحة
merci
ردحذف