كاع المعلومات لي خاصك تعرف على اختلال الهرمونات

كاع المعلومات لي خاصك تعرف على اختلال الهرمونات

مقدمة:

كلنا تانسمعو مصطلح الهرمونات و عند البنات بزاف المصطلح ديال الهرمونات عندي مخربقين و تاتشوف المزاج ديالهم متقلب بزاف و خصوصا اثناء العادة الشهرية. اليوم انفهمو اشناهوما الهرمونات؟اشنو دور ديالهم؟امثلة ديال الهرمونات؟الاعراض ديال الاختلال فالهرمونات؟و الاسباب ديالو؟ من بعد انشوفوالاختلال الهرموني عند النساء ؟ و حتى الرجال كدلك؟ اياه ا سيدي تا الرجال ممكن يكون عندهم خلل فالهرمونات . و اخيرا واحد الخاتمة صغيرة غاندوي ليكم فيها كيفاش البنات مساكن ماشي لخاطرهم تايوقعو ليهم دوك التقلبات ههه

كاع المعلومات لي خاصك تعرف على اختلال الهرمونات

اشناهيا الهرمونات؟

الهرمونات هي واحد المواد بيوكيميائية (كلمة بيو: تاتعني شي حاجة متعلقة بكائن حي) يعني واحد المواد تاتفرز من طرف الجسم ديالنا و بالضبط من واحد النوع دلاعضاء سميتهم الغدد هاد الغدد الدور ديالهم الافرازات بكل انواعها و من بينهم الهرمونات. هاد الهرمونات تاتمشي من غدة معينة للهدف ديالها لي تايكون واحد العضو اخر فالجسم عن طريق مجرى دم يعني فلعروقة على شكل رسالة من ديك الغدة لداك العضو.

اشناهوا الدور ديال هاد الهرمونات ؟

قلنا اسيدي و يا لالة هوما عبارة عن رسالة تاتصيفطها الغدة للعضو باش يا هو يفرز شي مادة اخرى اولا يحبس باراك مايفرز لينا باش يبقى عدنا التوازن ديال الهرمونات و تا ديال المواد داخل للجسم حيت سبحان الله العظيم ضروري ما الجسم ديالنا يكون فيه واحد الكمية محددة من كل مادة معينة الى زادت او لا نقصات تعتبر مشكيلة و هنا تايجي دور ديال الهرمونات باش يحافضو على هاد التوازن نعطيكم مثال بسيط دب منين تاتاكل شي وجبة سكر تايطلع فدم و ماخاصش يفوت واحد القيمة فالدم داك سكر هنا تايجي دور ديال البانكرياس لي هو غدة باش يفرز الانسولين (هرمون) باش يقول للعضلات و الكبدة دخل داك سكر زايد يعني هنا الانسولين عبارة عن رسالة و هدا هو الدور ديال كاع الهرمونات هكا دايرة الخدمة ديالهم. الهرمونات ادا تايدخلو فكاع الوظائف دلجسم ديالنا الهضم،شهية ، البناء ،تنظيم النوم،دقات القلب،حتى من الاحاسيس بحال الحب و داك الكدوب راه غي هرمونات هنهه انشاء الله اندير موضوع على كاع الهرمونات المهمة فالقادم من الايام

أمثلة ديال الهرمونات؟

هرمون التيستوستيرون:هو الهرمون ديال رجال الخشونة و داكشي يعني الصفات الرجالية اللحية و العضلات و الصوت الخشن ....

هرمون الاستروجين:اوا هدا الهرمون ديال الانوثة يعني صفات الانثوية ، الثدي، شعر العانة و الابط، تنظيم الدورة الشهريةو الجهاز التناسلي الانثوي

هرمون الانسولين: هو الهرمون لي تايهبط المستوى تاع سكر فدم منين تاناكلو شي وجبة

اشناهوا الاختلال فالهرمونات؟

هو منين الجسم ديالنا تايفرز بزاف دلهرمونات فالدم او العكس واخا يكون هاد الخلل غي صغيور راه مشكل نص ميليغرام زايد ولا ناقص راه موصيبة كحلة ههه(منين تاندوو على الكميات ديال المواد في الجسم متانبقاوش نتعاملو بلغرام شي حاجة صغار من لكرام بزاف شد لغرام و قسمو على مليون و مليار هادشي باش تايتعامل الجسم) يعني خلل صغيور غايدير لينا المشاكل فالوظائف دلجسم ديالنا

اشناهوما الاعراض ديال الاختلال فالهرمونات؟

-زيادة او نقصان فالوزن بدون سبب

-العرق بدون سبب

-متاتنعسش مزيان

-مرة تحس بالبرد مرة الصهد فنفس الوقت

-جلد جاف

-دقات القلب تاتغير ريتم بشكل مفاجئ يعني مرة يضرب بزربة مرة بشوية

-هشاشة العظام

-التغيرات في تركيز السكر فالدم بشكل مفاجئ

-العياء ديما و لمدة طويلة بلا مبرر

-العطش الزايد

-الكآبة

-الصداع فالراس

-التغيرات فالشهية

-الصوت تايغلاض شوي عند البنت

-ضباب فالشوف

-حساسية الثدي

..

اشناهيا الاسباب ديال هاد الخلل الهرموني؟

كلنا بدون اسثناء معرضين للاختلال فالهرمونات فواحد الفترة من حياتنا ضروري ضروري ، ولكن بعض المرات تايكون المشكل فدوك الغدد لي كنا دوينا عليهم متايبقاوش خدامين مزيان من بعد ماكاتعطيهم العصى مزيان او لا متاتخليش الجسم ديالك يعيش طبيعي كيف خاصو يكون فحال مثلا نعاس لي متاتنعسش مزيان و الصهير و التدخين و الكحول و حتى دراري لي تايتعاطاو الهرمونات باش يصحاحو بين ليلة و نهار المهم الى ماتكايستيش على راسك اتزقلها، الاسباب دب:

-الاجهاد الشديد و ماتاتعطيش لجسمك الراحة

-ارتفاع السكر فالدم ديما ديما يعني كل ساعة تاكل

-نقص السكر فالدم يعني متاتاكلش مزيان

-الغدة الدرقية لي هي واحد الغدة كاينة فوق القرجوتة دور ديالها مهم بزاف خاصها موضوع بوحدها ههه

-سوء التغدية يعني تغدية مامتوازناش

-زيادة فالوزن تا هي تادير مشكل فالهرمونات

-حبوب منع الحمل

-المخدرات

-ستريس

-الحساسية المفرطة

-تاتاكل صوجا بزاف

-التعرض للسموم و المواد الكميائية السامة فحال المبيدات الحشرية و النباتية

الاختلال الهرموني عند النساء؟

النساء تايتعرضو لهاد الاختلال الهرموني بزاف فمراحل مختلفة فحياتهم و طول حياتهم و هادشي منين تاتبغي تبلغ و اثناء الدورة الشهرية و الحمالة و الولادة و الرضاعة الطبيعية.

اوا يا سيدي دب نتعرفو على المعانات ديال عزيزتنا الانثى :

-دورة شهرية مامنتاظماش و شديدة و مؤلمة بزاف

-هشاشة العظام

-ارتفاع درجة الجسم و التعرق باليل

-جفاف المهبل

-حساسية الثدي

-عسر الهضم

-الاسهال و الامساك

- حب الشباب اثناء و قبل و بعد الحيض

-نزيف الرحم من غير دم الحيض

-زيادة نمو الشعر في مناطق مختلفة الوجه، العنق، الصدر و الظهر

-زيادة الوزن

-شعر تايولي رقيق و تايطيح

-ضخامة الصوت

-ضخامة البظر

الاختلال الهرموني عند الرجال؟

تا رجال تا هوما تايدوزو من فترات طبيعية فحياتهم ديال الاختلال الطبيعي فالهرمونات فحال مرحلة البلوغ و الشيخوخة

اشناهيا الاعراض ديالو عند الرجال؟

الى شفتي شي واحد من هاد الاعراض او مجموعة منهم فممكن غي خلل فالهرمونات:

-الشهوة الجنسية تاتقلال ولا تاتنعادم

-الضعف الجنسي، قلة و ضعف الانتصاب

- عدد الحيوانات المنوية تايقلال

-الكتلة العضلية تا هي تاتقلال

-بروز الثدي و هنا فرقو بين بروز الثدي ديال الغلض و ديال المرض ديال المرض راص هو لي تايكون منفوخ بواحد شكل غريب

-حساسية الثدي

-هشاشة العظام

كلمة ختامية: 

و لي تانعطي فيها رأي شخصي ، كيفما شفتو البنات او الانثى بصفة عامة لغالب الله هكا دايرين تاتجي شي فترات من حياتهم تايترونو مزيان ماشي لخاطرهم ولكن حيث الجسم ديالهم فرض عليهم داكشي فحال شي واحد تايتعاطى المخدرات منين تايتقطع تايولي فشكل و تايولي غي يغوت و معصب غا بوحدو ولي دوا معاه يدور فيه هكا تايولو البنات و تايحسو بواحد الوجع و واحد الالم مانقدروش حنا كداراري نتحملوها لهدا الله عز و جل خلق فيهم واحد صبر خرافي لهدا خاصكم الدراري تحاولو تصبرو عليهم فهاد الفترات و تلتامسو ليهم العذر و ماديوش على هضرتهم و تصرفاتهم حيت ربي لي مطالع بيهم فديك الفترة ولكن نصطر على غي فديك الفترة هههه فترات خرين خرج عينيك ماضصرهاش بزاف و ماتزيرش تاني بزاف شويا شويا

نتمنى يعجبكم الموضوع ديال اليوم و لي مافهمش اي حاجة يخليها لي فتعاليق و انا غانجاوب ان شاء الله