كيفاش سم الافعى تايقتل؟

الموضوع: سم الافعى.

كيفاش سم الافعى تايقتل

كلنا عارفين بلي سم الافعى تايقتل و الى عضك لحنش مع ظهر و ما دكيتيش مضاد للسم فاسرع وقت مع العصر يصلو عليك فجامع ههه المهم ليوم موضوعي هو كيفاش سم الافعى تايقتل الانسان ؟ اشنو كاين فهاد السم ؟ اشنوهاما الخصائص ديالو ؟ مناش تايتكون؟ و علاياش بضبط كايأثر فالجسم ديالنا ؟ تبعو مزيان نتمنى يعجبكم الموضوع.

نبدة عن الافعى؟

كل كائن على هاد الارض طور خصائص باش تمكنو من العيش و تحدي الصعاب و التغلب على الخصصوم و اصطياد الفرائس . اوا الحنش ماشي من العاكزين تا هو طور الغدد اللعابية (الدفال) ديالو و ولاو غدد سمية مرتابطين بالانياب ديالو. تايتمكن من خلالو من قتل الفريسة و شلها عن الحركة و هضمها جزيئا قبل مايدخلها لكرشو. اي يعني تكسير البروتينات و الكربوهيدرات (السكريات) و الدهنيات لي تايتشكلو منهم خلايا الجسم.

مناش تايتكون السم؟

اسيدي السم المكون الاساسي ديالو هوما البروتينات بنسبة 90 تال 95 فالمية و بالخصوص الانزيمات يعني ان الانزيمات عبارة عن بروتينات لي دور ديالهم هو تسريع تفاعل معين نعطيك مثال دب مثلا بغينا كلينا لحم و لحم فيه البروتين باش يتهرس داك البروتين ضروري من الانزيمات حيت الى غانتسناوه تا يتفكك على خاطرو ايخصو ايام و سنين اذا الانزيم تايسرع ديك العملية ديال تفكيك البروتين . و ماشي غي البروتين جمييع التفاعلات لي كاطرا فالجسم ديالك فلا بد من انزيم كيفما بغا يكون هاد التفاعل اذا خلاصة الامر فالانزيمات عبارة عن محفزات و مسرعات للتفاعل و الى ماكانتش ماكاينش تفاعل نتمنى تكونو فهمتو هاد النقطة. قلنا المكون الاساسي هو البروتينات و نسبة كبيرة منهم عبارة عن انزيمات. هاد البروتينات منهم بروتينات سمية و غير سمية ديك غير سمية تايصايبو منها الدواء حاليا لبزاف ديال الامراض. و دب غانقوليكم انواع هاد الانزيمات لي كاينين فالسم . عندك الهيدرولاز hydrolase، امينو اوكسيداز amino oxydase, فوسفوليباز phospholipase, ترونبين لايك بروكواكولون tronbin like pro coagulant, كاليكرين لايك سيرين بروتياز kallikrein like serine protease, ميتالوبروتييناز metalloproteinase. ههههههه بلاما مادوخو ماشي مطالبين تعقلو على الاسماء انا غادي نوريك غي كل واحد اشنو تايدير للجسم ديالك. هادو الانزيمات كاين دب واحد الشق اخر من البروتينات لي هوما لبيبتيدات السمية و هادو عبارة نيت عن بروتينات لكن اصغر منهم حجما منهم سيتوتوكسينcytotoxin او بيبتيدات التسمم الخلوي , cardiotoxin كارديوتوكسين او بيبتيد التسمم القلبي، نوروتوكسين norotoxine بيبتيدات التسمم العصبي. ديك توكسين toxin فنهاية الكلمة تاتعني سم فينما تشوفوها عرفو راه شي حاجة خطيرة ههه.

دب هاد المكونات كاملين لي قلتي لينا اش تايديرو بالسلامة الجسم ديالنا؟

الهيدرولاز hydrolase: تايفرتت اي حاجة قدامو بروتين دهون و السكريات و حتا الADN و لي هوما الجينات ديالك و نتوما تاتعرفو الخلايا ديال الانسان متشكلة من هاد المكونات الاساسية و بالتالي هاد الهيدرولاز تايخربها.

امينو اوكسيداز amino-oxydase: البروتين هو عبارة عن احماض امينية لاصقة مع بعضياتها باش تعطينا البروتين فحال الى قلتي شي تسبيح تمام داك تسبيح كامل هو البروتين و داك العقيق هوما الاحماض الامينة و هاد امينو اوكسيداز تايخسر الاحماض الامينية يعني متايبقاوش يديرو الوظيفة ديالهم.

فوسفوليباز phospholipase: خصكم تعرفو بالي الخلية كيفما بغى يكون نوعها داير بيها غشاء متشكل اساسا من فوسفوليبيد phospholipide و هاد زعتر سميتو فوسفوليباز يعني تايكسرهم و بالتالي الخلية مشات ا عمو هههه.

ترونبين لايك برو كواكولون thronbin like pro cuagulant دب اسيادنا فدم كاينين صفائح دموية thrombocyte و بروتينات دور ديالهم هو انك منين كاتجرح تايمشو كايتجمعو فجرح باش يتسد و يوقف النزيف او هاد ترونبين لايك برو كواكولون تايجمع هاد الترومبوسيت فالدم بلا مايكون جرح و تايصدقو لعروقة مبوشيين.

كاليكرين لايييكك سيرين بروتياز kallikrin like serine protease هو و ميطالوبروتيناز metaloproteinase هادا تايخرب كاع البروتينات ديالنا لي التركيب ديالهم اللاسساسية شي معدن. فحال مثلا داك البروتين لي تاينقل الاوكسيجين للخلايا دلجسم و لي كاين فخلايا الدم الحمراء سميتو hemoglobine هيموكلوبين تايشدو تايفرتك باباه و بالتالي اختناق الخلايا و الموت المباشر.

نوروتوكسين norotoxine هادو تايهاجمو لينا الخلايا العصبية و الدماغية . نتوما كاتعرفو بلي كاع اعضاء الجسم الكبدة الرئة العضلات كلشي تايتحكم فيهم الدماغ عبر ارسال سيالة عصبية تال داك العضو اوا كاين واحد الخيط غادي من دماغ لكاع الاعضاء تايتسماو لي nerfs نيغ او الاعصاب هاد الاعصاب ماشي لاصقين نن فحال شي خط متقطع و طرف تايصيفط لطرف تا كايوصل الميساج للعضو باش يدير شي حاجة اوا ديك نقطة التقاء عصب مع عصب سميتها سينابس اوا داك سينابس راه وزين على قدو باش يدوز ميساج كاينين بزاف ديال الجزيئات خاص يتفرزو من بينهم اسيتيل كولين acetylcholine و الكالسيوم لي مهمين بزاف.

السم ديال الافعى فيه كيما قلنا شي نوروتوكسين norotoxins تاتعني مسمم الخليا الدماغية فحال بانكاروتوكسين bungarotoxin و كوبراطوكسين cobratoxine هادو تايبلوكيو المستقبلات ديال الاسيتيل كولين و بالتالي ماكايدوزش الميساج من عصب لعصب او يا سيدي الشلل التام ماكاين لا حركة لا والو حيت باش تحرك العضلة خاص يوصلها ميساج من الدماغ.

اوا بهكا تاتموت نعام ا سيدي بكل بساطة هههههه.

واش السم عندو شي علاج ؟

ما عندك اولدي غي تشد ديك العضة تخوي فوقها لالكول شركها شويا بشي زيزوار و مص داك الدم و لوح مص و لوح شي عشرة دلمرات و جري لصبيطار يدكو ليك شي انتيدوت antidote مضاد ديال السم بالخف ماتعطلش هههه.

كلمة ختامية:

اوا ولفنا هاد كلمة ختامية هههه المهم لي بغيت نقول فيها هو انني تانستغل المواضيع ديالي لي تانددير ليكم باش ندخل فيهم معلومات اخرين تستافدو منهم مابغيتش ندير ليكم موضيع فييها اشناهيا الخلية اش ناهيا العضلة غايجيكم داكشي ممل لهدا تانختار موضوع زوين و تاندير فيه المعلومات باش تستافدو و تا ناس لي ماعندهاش شي نيفو كبير و مستوى متقدم فالدراسة او لا ماشي تخصصهم البيوللوجيا يسهال عليهم الفهم . نتمنى الموضوع يكون نال اعجابكم و ماتنساوناش من صالح دعائكم و بارطاجيو مع صحابكم الى بانت ليكم المعلومة مفيدة و تستتحق تنشر اوا ولي عندو شي تساؤل مرحبا حطو ليا فتعليقات و نجاوبكم الى عرفت و تا الى ماعرفت ليه ندير بحث عليه و نجاوبكم و دمتم و دمنا للقرااءة اوفيا و للعلم متعطيشين و للمعرفة محبين.