االموضوع: التعفنات و الالتهابات المهبلية.
اهلين شباب نتمنى راكم بيخير و فتمام الصحة و العافية.
موضوع لييوم كيف شفتو هو واحد الموضوع مهم بزاف للنساء ولكن تا الرجال عندهم دور فيه اذا ركزو معايا مزيان.
العديد من النساء تايواجهو مشكل ديال التهاب المهبل و مجموعة من الافرازات بكمية كبيرة جدا و بعض المرات دات رائحة كريهة و متايعرفوش مناش شنو السببب ديال داكشي ، ليوم ان شاء الله انوضح ليكم مجموعه من النقاط بخصوص الانواع ديالو ؟ و الاسباب والاعراض لي تسبب هذا المرض ؟وكذا طرق العلاج؟ وكذا طرق الحمايه او الوقايه منه؟
 |
| التعفنات و الالتهابات المهبلية |
شنو هما التعفنات او الالتهابات المهبليه؟
التعفنات او الالتهابات المهبليه تايكون سوا بسباب شي عدوة او شي مادة كيميائية مهيجة. تاتكون غالبا عند ملاحظة افرازات لزجة بطريقة غير معهودة و غير طبيعية او دات رائحة كريهة، و كدا حكة و احمرار على مستوى الشفايف ديال المهبل.
على مستوى المهبل كاينين واحد تجمع سكني ديال لبككتيريا النافعة لي تاتسمى bacilles de Doderlein و لي تايخلقو واحد الوسسط حمضي باش يحاربو البكتيريا الضارة لي تاتقدر دخل للمهبل و من جيهتهم تتايستافدو من الغداء ديال الجسم و الهرمونات و زيد و زيد. المهم معاونين هوما و دريات خههه.
اشناهوما الاعراض ديال هاد المرض؟
الى كان عندك واحد الافرازات مهبيلة بشكل غير طبيعي فنيشان راك عندك التهاب مهبلي و على حساب الاصل او المسبب ديال هاد الالتهاب تانميزو تلاتة دلانواع دسوائل:
-بيض فحال لحليب و تقيل عرفي بلي السبب هو الفطريات champignons.
-سائل و كتير و مصفر او مخضر شويا و ريحتو خانزة فراه السبب هو بكتيريات bactéries.
فحال رغوة منين تايكون السبب ديالو واحد الطفيلي parasite و هو حيوان صغيور متايبانش بلعين المجردة ولكن نقدرو نشوفوه غي بالمكبر بلاما نستعملو المجهر.
كاين اعراض اخرين ممكن يكونو مصاحبين لهاد الافرازات فحال:
الحكة.
الالتهاب و الم.
الم عند التبول.
الم عند ممارسة علاقة جنسية.
شفايف ديال المهبل تايطيبو و يتنفخو و تايعطو الصداع.
بالنسبة لهاد الاعراض تقدري تميزي اشمن نوع ديال الاصابة عندك واش فطريات ولا بكتيريا ولا طفيلي.
و منين تاتمشي عند طبيب تاياخد عينة من دوك الافرازات باش يعرف اشمن نوع ديال التعفن عندك.
اجي ندويو على الانواع ديال هاد المرض؟
كاينين ربعة ديال الانواع:
التعفنات لي السبب ديالهم طفيلي parasite: لي هو واحد لحيوان صغير كيفما قلنا تاينتاقل عبر العلاقات الجنسية الغير محمية و تا الماء و البرودويات ديال الطواليت لي ماتاتنقاش و تعقم مزيان.
التعفنات لي السبب ديالهم الفطريات champignons: هادو قليل فاش تاينتاقلو بالعلاقات الجنسية و لي تايكون السبب ديالهم غالبا انهم تايدوزو من داخل ديال الجسم مباشرة للرحم ، و كدلك الماء ديال البيسينات و الرملة ديال البحر كدلك ، هدا ميساج لديك لي تاتمشي تعوم بكريصين راه تاتقلبي تخرجي على صحتك ههههه.
التعفنات لي سبابهم البكتيريات bactéries : و لي هوما فالعادة تلاتة staphylocoques,streptocoques, colibacilles .
التعفنات لي سبابهم مواد كيماوية :فحال لي كاينين فداك الصابون تاع ريحة و داك زعت لي تاديرو راه ماشي صحي داكشي . وحتى شي ممارسة جنسية جاهلة او مشكل جلدي فحال لكزيمة.
شنو العلاج ديالو ؟
غالبا تايستعملو المضادات الحيوية الى انه كاينين علاجات اخرين طييعية، فحال الماء الدافئ و الملح للاستعمال الخارجي فقط ،بمقداار معلقة كبيرة فلتر دلماء، وخل التفاح ايضا يُساعد على موازنة درجة الحموضة في المهبل والقضاء على الفطريات والبكتيريا ويُستخدم كغسولٍ للمنطقة الحساسة بإضافة ملعقتين كبيرتَين منه إلى كوبٍ من الماء الدافئ واستخدامه مرتَين في اليوم على مدار أسبوعٍ كاملٍ، بالاضافة للماء لي تغلى فيه البابونج تا هو عندو خصائص مضادة للجراثيم.
كيفاش نتفاداو هاد الالتهابات و التعفنات؟
كيفما تاتعرفو النساء بصفة عامة عندهم دوك الافرازات سواء العادية او المرضية بشكل دائم يعني ضروري من النقا تم النقا اليكم اهم الامور باش تجنبو هاد الالتهاب و التعفن، كيف ديما الوقاية خير من الف علاج:
يوميا خاص لبنت او المرأة تنظف المهبل ديالها عل اقل و ماتفوتش جوج مرات باش ماتقتلش لبكتيريا النافعة و هدا غي بصابون ديال الحجرة عادي مافيه لا ريحة لا لون لا تا لعبة و برفق تام و ماشي داخل المهبل غي من برة.
- مباشرة من بعد تنظيف المهبل خاص ضروري شفايف ينشفو مزيان مزيان باش مايبقاش للبكتيريا لما فاش يتكاترو.
- متخلي الملابس الداخلية فازݣين ديما يكونو ناشفين و الى تبللو يتحيدو فاسرع وقت ممكن.
- اثناء الدورة الشهرية يجب تبديل الفوطة الصحية بشكل دوري ماتخليش داكشي نهار كامل لاصق تم هههه.
- تجنبو الملابس الداخلية الضيقة و ماشي اي نوع تلبسوه احسن نوع هو القطني خلونا من داك زعتر ديال البوليستير و نيلو حيت تايعرق بزاف و غايسبب ليك فتجمع ديال الجراثيم.
كلمة خثامية:
سبحان الله العظيم لعرا تايجي غي بلمصايب ديالو هههههه كي شفتو دب ديك لي غاتمشي تعوم بدو بياس احتمالية ان الرملة تقيس لي المهبل ديالها كبيرة بزاف بالمقارنة لي عامت و هي مستورة هههههه المهم انا ماسوقيش كل شاة تعلق من كراعها حنا تانهضرو علميا دب ، افضل بكثير انك تلبسي شي حاجة مستورة باش تحافظي على راسك من بزاف ديال الامراض ، حيت المهبل واحد العضو حساس بزاف بزاف ، ابسط الامور تقدر تاتر عليه، لدلك عليك بالحفاظ على نفسك ، من خلال انك تكون نظيفة قلبا و قالبا هههه اصلا بنات ليوم نقيات تبارك الله دمتن انيقات و نظيفات ، ماشي مزوقات من برة و مخربقات من داخل هههه المهم نتمنى يعجبكم الموضوع و اي اضافة او سؤال فمرحبا بيكم طرحوه ليا فالتعليقات و غانكون سعيد اني نجاوبكم ، دمتم متألقين و لأخبرني متابعين✌️