تأثير اللحوم الحمراء على جسم الانسان.
تقديم:
قبل كل شيء اللحم واحد العنصر مهم بزاف فالتغدية ديالنا بحيث ان القيمة الغدائية ديالو عالية بزاف،تايتوفر على مجموعة من المعادن الحديد و الزنك و السيلينيوم و الفيتامينات b6 b3 b12.
 |
| كل ما تحتاج معرفته عن تأثير اللحوم الحمراء على جسم الانسان |
لاش كايصلاحو هاد المواد؟
الزنك: يقوي المناعة و مفيد للجنين و الام الحامل و مزيان للشعر و البشرة باختصار بلاما ماندخلو فتفاصيل مافايديناش ههه.
الحديد: باش يوصل لوكسيجين لي تاتنفس لكاع خلايا جسمك خصك واحد البروتين مهم سميتو هيموجلوبين باش يتصايب هاد البروتين ضروري من الحديد هادي وحدة من بزاف مزال ندير مواضيع شاملة على كل معدن ان شاء الله.
السيلينيوم: هاد المعدن مزال محط الدراسات لحد الان عندو علاقة بالوقاية من السرطان بحيث انو مضاد للاكسدة يعني نتا منين تاتاكل الماكلة و تاتهضم تايشيط شي ديشي خايب لصحة و مضادات الاكسدة كاتشد هاد الديشي و تايسهال التخلص منو من بعد بل و كاتمنع فبعض الحالات اصلا يتكون هاد الديشي، و تايقلل من تساقط الشعر، تايعاون فجريان دم.
فيتامين b3: مزيان لجلدة و البشرة نعومتها و التماسك نتاعها.
فيتامينb6: خفض ضغط الدم المرتفع، خفض مستوى الكوليستيرول في الدم،الحد من تجلط الدم يعني دم يبقى خاتر و مزيان.
فيتامينb12:صحة المخ و سلامة الجهاز العصبي،دور اساسي في تشكل الكريات الحمراء لي هوما لي تاينقلو الاوكسيجين للجسم كامل.
واش اللحم عندو اضرار؟؟
وي طبعا عندو اضرار حيت تربط اكل اللحم بالعديد من الامراض و خصوصا اللحوم الحمراء المصنعة لي شبعانة مواد كيمائية و ملحة و زيد و زيد هاداك موضوع بوحدو دب ندوو غي على لحم طري ههه.
الزهايمر: اللحم كيما قلنا عامر بالحديد و منين تاناكلو الحديد بزاف فهدا كاي أدي لتجمع ديالو فالدماغ و بالتالي الاصابة بمرض الزهايمر.
سرطان: دارت واحد دراسة على شي تسعين الف ديال العيالات و كتاشفو بلي العيالات لي تاياكلو لحم بكثرة تزادت عندهم نسبة الاصابة بسرطان الثدي عكس لي ماتاياكلوهش بزاف.كدلك كاينة علاقة وطيدة بين الاكثار من ثناول اللحوم و سرطان القولون يعني المصران لغليض.
الذهون المشبعة: الدهون المشبعة هي واحد النوع ديال الدهنيات لي خطير بزاف بحيث انها تاتحفز صناعة الكوليستيرول المضر LDL هاد الكوليستسرول المضر تايقد يبلوكي لينا العروقة ديال الدم و بالتالي خطر الاصابة بامراض القلب من خلال ان الشرايين لي هوما لعروقة لي جايين من القلب و كاديو دم للاعضاء تايتبلوكاو بهاد الكوليسترول LDL.
الفرق بين الانسان العادي و لي تايدير الرياضة ؟؟
هنا فين تايجي دور ديال رياضة ا شباب بحيث انها تاتساعد فالتخلص تقريبا من كاع هاد الاعراض فالانسان الرياضي تايكون عندو واحد الموطور ديال الهضم مليح و مجهد مزيان لي جات باسم الله تايحرقها و يستعملها لصالحو و تايتخلص من سموم عن طريق التعرق حيت الانسان الرياضي تايشرب الماء بزاف يعني الى خدينا الكمية لي غادي ضر انسان عادي مع رياضي فرياضي يقدر ياكل كمية اكبر منو شويا بلاما يوقعو ليه اي مشاكل .
اشناهيا الكميات الموصى بها؟
كاينين بزاف ديال الهضرة فهاد القضية انا تانقول من خلال كاع ديك الهضرة انو بالنسبة الانسان العادي جوج مرات فالسيمانة ولا تلاتة ماكس الله يجعل البركة تقريبا شي نص كيلو ماكس فسيمانا . بالنسبة للناس لي تايترينيو كيلو فسيمانة موزع على لايام ديال الاسبوع تقريبا شي مية و خمسين غرام تال ميتين فنهار.
كلمة ختامية:
دب واخا تسمعو هاد الهضرة كاملة مزيانة ياه ولكن من غير هاد المشاكيل خطر اخر متعلق باللحوم بصفة عامة يحلق فالافق و لي هو الهرمونات لي تايعطيو لبهائم باش دغيا يكبرو و يتنفخو و المواد المصنعة لي تايوكلوهم باش يسمانو دغيا بحيث تايبقى ديشي ديالهم فلحم و تايسبب مشاكل اخرى فاختلال الهرمونات فجسم الانسان لي دوينا عليهم ديك نهار بالنسبة ليا انا يحاول بنادم يقلب على ظاكشي لي طبيعي و تا لحاولي دلعيد جيبو من شي دوار فالبادية تاياكل غي الربيع و الخظرة ديال دار باراك . و حاجة اخرى شتي واخا يقول ليك شي حاجة راه فيها المنفعة عرف بلي الى كترتي منها غاتشكل خطر على حياتك كن اكيد شتي لما الى كترتو منو غايدير ليكم المشاكل خلاصة القول هدا العيد سيمانة ولا جوج ماشي مشكل بنادم ياكل شوي دلحم مزيان ولكن على طول العام ماتكتروش منو و تابعو النصائح الكميات الموصى بها و مارسو رياضة و ماتخافو والو .
نتمنى الموضوع يكون نال اعجابكم و لي مافهمش شي حاجة مافيها باس يسول فتعليقات انا غانجاوبو بلاما تحشمو راه العلم مافيهش غايضحكو عليا انا راه منين متانفهمش شي حاجة واخا تكون محاضرة جايين ليها بروفيسورات و علماء من خارج لوطن تانطلقها ليهم و عادي جدا هههه يله يله بارطاجيو راني ممنوع من البارطاج و عيدكم مبارك سعيد الاحباب