البيولوجيا في المغرب (الجزء الاول)

البيولوجيا في المغرب (الجزء الاول)

فهاد الجزء مغنهدرش على الأفاق و إنما على النظام الدراسي و أنواع الإجازات و الماستر لي كاينين.

الأغلبية كايعرف بلي كاين نوعين من الإجازة:

كاين الإجازة الأساسية او licence fondamentale

و كاين الاجازة المهنية او licence professionnelle

البيولوجيا في المغرب

أولا الإجازة الأساسية:

و كيف ما كيقولو هي علمية اكثر ما هي عملية أي انها كتركز على الجانب العلمي أكثر , عكس النوع الثاني.

و ابتداءا من سنة 2014 فيما سمي بالبنية الجديدة لشعبة علوم الحياة فإن الدراسة ديال هاد الشهادة كتكون ف 3 سنوات مقسمة على 6 فصول بمجمل 38 وحدة "موديل"

و فالفصل السادس كتقسم الى 3 أقسام:

BCM:Biologie Cellulaire et Moléculaire

BE:Biologie de l'environnement

BAP:Biotechnologies et amélioration des plantes

حتى جاء النظام ديال 2018 لي غيعاود يرد الاجازة ف 4 سنوات و خربقنا و خربقني حتى أنا فكتابة هاد الموضوع😒,و باقي مالقيتش البنية ديالو.

ثاني نوع هو الاجازة المهنية:

هاد الشهادة عكس الأولى كتركز أكثر على إكساب الطلاب خبرات ولوج سوق الشغل.

و الولوج للدراسة فهاد الشهادة خصك يا إما تجتاز مباراة لي كيدوزوها الحاصلين على دبلوم الدراسات الجامعية "DEUG" او أي دبلوم معادل له فحال ديبلوم التقني المتخصص من احد مدارس و معاهد الدولة.

و هنا كاين تدقيق و انتقاء حسب المعدلات و المقاعد محدودة بزاف بين 25 و 30 مقعد على حسب التخصص.

و كاين طريقة ولوج ثانية و لي هي مباشرة من بعد الباكالوريا و لكن قلييييلة بزااف لدرجة أنني قلبت فمؤسسات ابن زهر كاملين لقيت وااحدة متعلقة بالبيولوجيا لي فيها تخصص فالتكنولوجيا الحيوية النباتية biotechnologies végétales ف تارودانت.

كتقرى ف 3 سنوات مقسمة الى 6 فصول بمجمل 36 وحدة "موديل"

و طالبين باكالوريا فالعلوم التجريبية و ب mention فمادة علوم الحياة و الارض.

أو أي شهادة معادلة لها.

الفرق بين الشهادتين:

الاجازة المهنية و الأساسية بجوج عندهم مباريات خاصة بهم يعني كاين مباريات خاصة بالاجازة الاساسية غير متاحة لأصحاب الاجازة المهنية و العكس صحيح , و أصحاب الاجازة المهنية عندهم الاسبقية فاجتياز بعض المباريات,فحال مباريات ولوج المراكز الجهوية لمهن التربية و التكوين ديال الأساتذة و منحصرة فقط على لي تحصلو على إجازة مهنية عندها علاقة مع المباراة ,فحال مجال التربية و التعليم.

و كيف ما كتلاحظو فالاجازة الاساسية كتركز على الجانب العلمي أكثر, و كاتقري البيولوجيا عامة ثم من بعد كتخصص بينما المهنية مباشرة كتخصص.

و الفرق الكبير بين هاد الشهادتين هو أن الأساسية كتمكنك تكمل يا إما فالماستر الأساسي او المتخصص "المهني" , كاتختار واحد.

بينما المهنية كتمكنك فقط تكمل فالماستر المتخصص "المهني".

و غادي نخلي روابط ديال الانظمة بجوج و البنيات و الوحدات ديالهم ,كاين فرق بيناتهم.

أنواع الماستر كاين 3 أنواع:

أولا الماستر الأساسي master recherche:

كان كيتسمى من قبل "دبلوم الدراسات العليا" و كيغلب فيه الجانب النظري أكثر من التطبيقي, و يمكن للطالب إكمال الدراسة ديالو فسلك الدكتوراه بعد هاد الماستر.و كيفما قلنا هاد الماستر كيكملو فيه غير أصحاب الإجازة الأساسية.

النوع الثاني هو ماستر متخصص master spécialisé :

كان كيتسمى قديما "دبلوم الدراسات المعمقة" و هو كيتعمق فأحد المجالات و كيمزج بين النظري و العملي و الطالب قبل مايتخرج كيخصو يدوز واحد فترة تدريب فإحدى المؤسسات لي عندها علاقة بالماستر ديالو.

هاد الماستر ماكيحملوهش حيث كيقولو المواد ديالو لا علاقة مع العملية , و أيضا المشكل ديالو أنك مايمكنش دوز دكتوراه من بعد التخرج.

النوع الأخير هو الماستر المؤدى عنه master payant :

هو كيتعتبر كدبلوم جامعي كيعادل Bac+5.

أي انه فقط دبلوم كايعادل الماستر حيث كتخلص طبعا الثمن ديالو 42000 درهم.

يمكنلك تدفعا مقسمة على 4 اجزاء لكل فصل تخلص جزء , حيث كاتقراه غير عامين فحال دبلوم و كيعادل 5 سنين , و كيف ما قال سوينغا هما لي قالو هاد شي ماشي انا , عندكم ضربوني😂😂.

الأفاق غنهضر عليهم فأجزاء أخرى ان شاء الله بطريقة مفصلة.

لي مافهمش شي حاجة يعاود يقرى الموضوع بتركيز.

لي عندو شي سؤال مرحبا😊.

mouhamed el mansouri