كل ماتحتاج معرفته عن دم الحيض و الدورة الشهرية
الموضوع: كل ماتحتاج معرفته عن دم الحيض و الدورة الشهرية.
تقديم:
لا شك اننا تقريبا كاملين تانعرفو بلي دم الحيض او العادة الشهرية هو خروج الدم من رحم المرأة بشكل دوري كل شهر. لكن كاينين بزاف ديال الشائعات و المعلومات الغالطين بخصوص هاد الموضوع لي ماعندها تا اساس من الصحة فهاد الموضوع ان شاء الله غادي نتعرفو على كاع المعلومات لي خاصنا نعرفو و نفهمو باش اولا نصححو هاد المعلومات الخاطئين و تانيا نفهمو بطريقة علمية مبسطة هاد الضاهرة الطبيعية.
اولا غادي نتعرفو على اشناهوا الدم بصفة عامة و شنو هو دم الحيض و الدورة الشهرية؟ شمن عمر فاش كاتبدا و امتا تاتوقف؟ اشناهوما مراحل الدورة الشهرية؟ اشناهوما الاعراض ديالها؟.
اشناهوا دم بعدا؟
اسيدي دم هو واحد سائل تايجري فلعروق ديالك. دور ديالو هو نقل الجزيئات و المواد اللازمة من اجل تغدية الخلايا فحال البروتينات السكريات الدهنيات المعادن الفيتامينات الاكسجين و ما الى دلك و كدلك التخلص من ديشي او فضلات ديال الخلايا بحال السموم و تنائي اوكسيد الكاربون لي تانخرجوه من رئة ديالنا من بعد. المكونات ديالو كاينين 3 أساسيين خلايا حمراء (كريات الحمراء) هادو هوما لي تاينقلو ليك الاوكسيجين و تايهنوك من تنائي اوكسيد الكربون بشكل مختصر، كاينين الخلايا البيضاء(الكريات البيضاء) و لي هم الخلايا المناعاتية هادو هوما البوليس ديال الجسم فينما بان ليهم شي حد براني تايتلاحو عليه باش يهنوك منو فحال البكتيريا و الفيروسات و الفطريات .. دور ديالهم يتخلصو من هاد العجب لي براني على الجسم ديالنا، و كاينين الصفائح دور ديالهم هو ان دم يبقى مختر و يسدو ليك جروحة منين تاتجرح تايتجمعو فديك لبلاصة و تايحبسو نزيف. هدا هو دم و المكونات ديالو.
اشناهو دم الحيض؟
داك دم لي تايخرج من مهبل المرأة عبارة عن دم و نسيج اي لحيمات رقاق تايخرجو كل شهر. نقي مافيه لا وسخ لا نجاس لا سم لا والو بلعكس طاهر و نقي و كلو مغديات.
اشناهيا الدورة الشهرية؟
هي ان الجسم ديال المرأة تايستعد للحمل كل شهر بكل بساطة من خلال واحد جوج ديال الهرمونات لي هوما الاوستروجين و البروجيستيرون هادو هرمونات انثوية تاينظمو الدورة الشهرية يعني واحد الوقت فشهر تايتفرزو هاد الهرمونات بكترة و بالتالي تايوقعو مجموعة من الامور من بعد الافراز ديالهم.
اولا الانثى عندها مبيضين واحد عليمن و واحد عليسر و فيهم واحد العديد كبييير ديال البويضات صغيورين بزاف بزاف متايبانوش هكا للعين المجردة ولكن بعدد محدد منين تايساليو ليك صف مابقى عندك منين تجيبيهم ههه اثناء الدورة الشهرية دوك جوج هرمونات تايسببو فنضج واحد البويضة(متانقولو بيضة حتا تاتلتاحم مع حيوان منوي) و لي كاتكون مستعدة انها تخصب من طرف حيوان منوي. دوك الهرمونات لي قلنا عندهم دور اخر هو في جدار تاتكون واحد البطانة او نسيج ديال لحم شبعان عروقة و لحم فحال شي عشيش فين غاتعيش البيضة و باش تستافد مزيان من كاع المكونات و المغديات لي خاصينها خصها تكون معرقة مزيان و رطيطبة ديك البلاصة يعني ان جدار الرحم تايولي غليوض شوية و اسفنجي يعني كي شي قطين رطب باش تاخد البيضة راحتها و تلقى بلاصة مرحة و عامرة قصوص ههه، اوا منين الجسم ديالك متاتجيش ليه ديك البيضة المخصبة اش غايبقى يدير هو بداك لعشيش لي عامر عروقة و لحيمات غادي غي يضيع فيه المونة فابور ههه اوا من تم تايبان ليك دم و لحيمات خارجين اوا ها هي الدورة الشهرية. و واحد النقطة راه داكشي لي تايخرج و لي تاتقوليه نتا ياع تم فين كنتي معشش ا بو راس هههه.
امتى كاتبدا و امتا كاتسالي؟
هو نورمال بين 12 و 14 عام تاتبدا ولكن كاين لي تاتجيه بكري شويا عادي و لي تاتعطل عندها تاكاتفوت 16 تمشي عند طبيب ماشي حيت خطار ولكن غي باش ماتكونش مصحوبة بشي خلل ولا شي حاجة فلمبيض او شي حاجة هكا اوا لي تاتجيه بكري فيمكن يكون المشكل من التغدية لي تاتكون معالجة بهرمونات و خصوصا اللحوم لي تاتكون عامرة هرمونات. اوا تاتسالي فعمر بين 45 و 55 حيت تايساليو لبوييضات من المبيض.
اوا بالنسبة للدورة ديالها فبين 15يوم و 35يوم زعما امتا تاني تقدر تحيضي. تاتختالف من شخص لاخر و المتوسط هو 28 يوم و تادوم من 3 يام تال 10يام الى فتيها راه يقدر يكون شي خلل تم شوفي طبيب ديك ساع.
أعراض الدورة الشهرية؟
اودي منين تانتفكر هاد ستونات و عاد منين زدت بحث شويا بقاو فيا صراحة خههه ولكن هاد الاعراض راه ماشي فكاع لبنات غي شي وحدات المهم دوك لي تايبدل لمزاج ديالهم راه تقريبا هوما لي تايجيهم هاد الاعراض اذا على على بركة الله:
-القص القص: تاتولي عندهم شهية مفتوحة حيت الهرمون ديال الجوع تايتفرز بكترة لي هو ghrelin ماكاين كي ندير ليه ندرجو ههه كريلين هههه و تايبقاو يتشهاو بزاف.
-تورم و التهاب الثدي: ثدي تايولي حساس بزاف و تايضر .
-صداع و دوخة:
-اوجاع و الام في المفاصل:
-تشنجات و الم في البطن :
-الشعور بالتعب اكتر من المعتاد:
في مايلي الاعراض النفسية
-الشعور بالحزن ، الاكتئاب ، التوتر ، أو القلق
-تقلب المزاج: اخطر وحدة عهههه بحيث تايولي ميزاجها متقلب و هدا راجع لواحد الافراز كتير للهرمونات (خلل في الهرمونات)
-الشعور بالغضب أكثر من المعتاد: تاتولي على سبة تهضر معاها ضور فيك
-البكاء فجأة: دمعتها تاتولي قريبة دوي معاها ولا دير ليها شي حاجة بسيطة تبدا دمع سلاح دمار الشامل ديال البنات هههه
-تفضيل الوحدة: تاتولي باغا تبقى بوحديتها
-تواجه مشكلة في التركيز: متاتبقاش مركزة بزاف فالامور لي تادير
-مشكلة في النوم
-التغييرات في الرغبة الجنسية: تاتقل رغبة الجنسية فهاد الفترة بزاف اكتر من المعتاد.
دب هاد الهضرة لي قلت كاملة راه ماشي بضرورة تجي كاملة فدقة وحدة كل شهر تقدر تكون وحدة مختلفة ولا يجو مجموعين ولا ماتجي تا وحدة كاع كل وحدة وهيا تانعرف واحد نوع ماتادي متاتجيب فيه عادي فحال الايام العادية هههه.
اشناهو السبب ديال هاد الالم و التشنجات؟
منين تايبغي الجسم يتخلص من داك لعشيش يعني دوك لحيمات لي تصايبو باش تعشش فيهم البيضة و لي قلنا تايكون عامر عروق دموية باش يوصلو كاع الاحتياجات ديال البيضة و مايخصها والو. عضلات رحم تاتبقى تقلص باش هاديك العشة طيح بشويا بشويا. و دوك التقلصات هوما لي تايسببو الالم.
كيفاش نخففو من الالم و التشنجات؟
-الرياضة: من بعد ممارسة الرياضة تايتفرزو مجموعة من الهرمونات بحال ضوبامين و سيروتونين هوما هرمونات ديال السعادة و الارتخاء و تايساعدو فتخلص من مجموعة من الالام.
-حمام سخون: شي دوش سخون بعقلو غادي يساعد فتخفيف صداع حيت منين تاتسخن نتا لجسم ديالك تايديها مزال غي انو يرجع يبردك باش تبقى فديك 37 درجة ولي هي حرارة الجسم الطبيعية الى هبطي عليها تموت طلعتي عليها تموت هههه و متايديهاش مزال فلالم حيت الى جيت نشرح ليكم الالم بوحدو ايخصني موضوع بوحدو ههه المهم بالحمام سخون تانحيدو الالم عقلو عليها.
-وسادة دافئة: غاتشدي شي حاجة سخونة ديريها اسفل بطنك او ظهرك تا هي غاتساعد فتخفيف الالم.
-اكل الخضروات و الفواكه: خاصك فهاد الفترة مجموعة من الفيتامينات و المعادن حيت راه فقدتي واحد الكمية لا باس بها فداك الدم و النسيج لي خرج ، كما انا الغداء الصحي المتوازن و خصوصا لغني بالخضروات الخضراء المورقة(الخص،الكرومبل،الخيار،بروكلي....).
-اوا بالنسبة للادوية فحال مسكنات الالم فانا ضدها بتاتا و خصوصا انه يمكن نعوضوها بلويزة لي هي مسكن الم طبيعي ولا شي مشروب فيه الكمون و سكنجبير و المساخن و الابزار يا سلام هههه و الماء ديال البابوش تا هو مزيان .
معلومة اخرى قبل مانسالي الموضوع ، دورة شهرية قلنا فلمتوسط 28 يوم و تادوم 3 يام تال عشر ايام كل وحدة غادي تشوف شحال كاين فدورة ديالها و تنقص منها الايام لي تادوم فيها الدورة و واحد ست يام اخرى و غاتعطيها المدة لي ماغاديش تحمل فيها
نعطيكم مثال:
سيدة دورة ديالها فيها 30يوم و تادوم عندها الدورة 6يام غانقصو ستة من تلاتين اتعطيني 24 و نقص منها تاني ست يام اخرى اتعطيني18 نقسمها على زوج هيا 9 يام هاد يعني9 ايام من وراء الطمت (عملية خروج دم الحيض) الى وقع اتصال جنسي ماغاديش تحمل المرأة ديك ست ايام لي نقصنا هي الفترة ديال عيش لحيوانات المنوية فالمهبل ديال المرأة و باش تحمل المرأة فبعد هاد 9 هدا غي مثال و كل وحدة تحسب كيف بغات باش تعرف اشناهيا المدة لي خاصاها من وراء الطمت باش تحمل.
كلمة ختامية:
كلمتي انوجها للذكور من بعد للإناث، اولا ا دراري كيفما شفتو راه ماشي لخاطرهم مساكن راه تايوقعو ليهم مشاكل كبيرة فلهرمونات كيفما شفنا و اختلالات تاتسبب في تقلب مزاجهم و فغضبهم و اكتئابهم و الامهم لهدا حاولو ماديوش عليهم فهاد الفطرة ساعفو معاهم قدر المستطاع راه ماشي بلعاني كايديرو هكك، و ناس لي مزوجين راه مراتك تقدر تكون من ناس لي تايتشهاو ياكلو نوع ديال لماكلة محدد لهدا حاول توفر ليها واخا غي شوية من داكشي لي بغات الى ماعندكش طبعا الامكانيات المادية، حيت منين الانسان تايبغي شي حاجة و متايحصلش عليه الخلايا الدماغية ديالو تاتخربق و تايضهرو مشاكل نفسية اخرين، و حاجة اخرى كاين واحد نوع كايجيه واحد الالم و واحد الوجع صعيب بزاف بزاف،تشنجات على مستوى البطن و المعدة و الام فلمفاصل كيفما قلنا راه ماشي بلعاني اعيد و اكرر.
بالنسبة للاناث واخا هادشي كامل لي قلنا فحاولو تا نتوما تصبرو شويا راه واها هاد لهضرة كاملة لي قلنا الى انه كاينة قوة العقل لي يمكن تساعدك دير اي حاجة و تحكم فاي حاجة تا فلالم ديالك، و الى شفتي راسك جبتي لهبال كتر من لقياس مافيها باس كلمة زوينة من بعد طبعا ما تسالي الدورة الشهرية ماشي نكد قبل الدورة و اثنائها و بعدها هههههه و الى شفتو ازواجكم مايقدوش يوفرو ليكم شي حاجة فرفقا بهم صبري عدي باشما عطى الله الى ماكليتيهاش هاد شهر ماشي مشكل هههه المهم الله يرزقنا التفاهم و الصبر لي هوما المفتاح ديال كل العلاقات و الله يكون فعوان نسائنا لانه كون كنا حنايا تاتجينا لحيض كون هازين شي زرواطة ولا شي سيف لي دوا معانا نزلو عليه هههه اوا الحمد لله الحمد لله و مرة اخرى الله يكون فعوانهم راه حالتهم متايحس بيها غي الله اوا لهلا يخطيهم علينا ولهلا يخطينا عليهم نكمل بعضنا 😉
التسميات :
صحة