اجي تفهم كيفاش شراب تايدوخ(تايبوق)

الموضوع: اجي تفهم كيفاش شراب تايبوق.

تقديم:

لا شك انك تسائلتي شي نهار كيفاش زعما دب ناس منين تايشربو شراب تايتبوقو و تايولو دايخين من لخر متايبقاوش نورمال ههه اوا ليوم يا سيدي و يا لالة غاتفهمو مزيان كيفاش و غانستاغل لفرصة ندوي شويا على التاثير ديال شرااب (الكحول) على صحة الانسان و المخاطر ديالو الجسيمة و المدمرة للصحة إذا على بركة الله.

اجي تفهم كيفاش شراب تايدوخ(تايبوق)

اشناهي المادة الفعالة في الشراب؟

اسيدي سباب ديك دوخة كاملة هي هو المادة من الكحوليات لي سميتها ايتانول هادي هي الموصيبة لي تادير المشاكيل عههه.

اشناهوا التأثير ديال هاد الايثانول؟

هاد المادة كاتسبب تباطئ الدماغ و الانشطة العقلية بصفة عامة، و كاتسبب كدلك فانتاج عدد كبير من المنشطات لي كاتادي لفقدان الادراك و الوعي و الاحساس بالهلوسة، و بالتالي تركيز كايمشي و الاحساس بداكشي لي داير بينا كايزيد بزاف غي لحوايج لي تايكونو باينين بزاف فحال الاصوات المرتفعة و الاضواء المشعة...

و كيفاش تادير هاد الايثانول باش تسبب هادشي؟

دب اول حاجة بغيتك تعرفها بلي الجسم ديالك تايتواصلو الخلايا ديالو فيما بيناتهم بواسطة مواد بيوكيميائية فحال الهرمونات ( كنا دوينا عليهم فموضوع ديال اختلال الهرمونات) و الموصيلات العصبية هادو دايرين كي لهرمونات تماما غي نوع الخلايا لي تايتعاملو بيهم هوما الخلايا الديماغية هوما لي كايتواصلو بيناتهم بهاد الموصلات ، المهم اسيدي لخلية تاتصيفط شي برية (رسالة) لشي خلية اخرى فيها مثلا طلقي ليا سكر راه مابقاش فالدم و بما ان الرسالة خاصها تمشي عند خلية محددة تاتلقى فالمحيط ديال الخلية كاين واحد المستقبل لي تايستقبل غي داك نوع درسائل اوا منين تايستقبلو راه ديك الخلية كطبق شنو كاين فالرسالة مثلا طلق سكر فدم، اوا الجسم ديالنا كولو مستقبلات كل مستقبل عندو المواد لي كايستقبل خاصين بيه و بغيتكم تعرفو كدلك انه كاينين مواد كايتشابهو فشكل ديالهم يعني الى جاب الله لصقات مادة بلاصة اخرى فلمستقبل ماغايدي مغايجيب فيها غايدير داكشي لي مالف فالحالة العادية لي تاتجيه فيه ديك المادة الاصلية.

اوا اسيدي هاد الايثانول تايشبه لواحد المادة اخرى سميتها gaba : gama aminobutyric جابا و لي دور ديالها هو تكالمي الخلايا العصبية منين تاتكون ناعس ولا مرتاح ولا شي حاجة هكا اوا بما انهم متشابهين المستقبل ديال جابا تايستقبل تا الايثانول.

و عاوتاني كاين واحد المستقبل اخر سميتو NMDA:N-methyl-D-aspartate هدا تايستقبل واحد المواد اخرين لي هوما glutamate و glycine و serine( كلهم احماض امينية لي هوما شي بريكات باش تايتشكل البروتين دب نشرح هادو مزيان فلقادم من الايام ) المهم هادو مسؤولين على التذكر و الداكرة بصفة عامة الى بغيت نشرح ليكم الداكرة ايخصني مقال على قدو المهم نتوما دب غي عرفو بلي هاد المواد عندهم علاقة بالداكرة ههه . و حبيبنا الايثانول تايلصق تا على هاد المستقبل و متايخليهش فتساع.

و الا كاع لصقات هاد الايثانول على المستقبلات gaba و nmda شنو غايوقع؟

اوا منين تايلصق الايثانول على المستقبل gaba تايتقال عدنا التواصل بين خلايا دماغ يعني سيالة العصبية كاتباطئ ( سيالة العصبية فحال لا قلتي واحد عشرة دناس حدا بعضهم تايدوزو شي صندوق ديال الهندية بعضياتههم هههه) اوا الخلايا العصبية تاهوما تايدوزو بيناتهم مواد هههه و تانسميو هاد البلان السيالة العصبية اوا يا سيدي هاد السيالة العصبية كاتقال بززززاااف اوا هادشي تايسبب هدوء و خمول الجسم و ثقل الحركة حيت راه دماغ هو لي مسؤول على كلشي فلجسم ديال تال الحركة و بالتالي تاتشوف بنادم تايطربو هاد لحيط و يعاودو لاخر.

اوا بالنسبة منين تاتلصق الايثانول على المستقبل NMDA فالدكريات تايتخربقو و تايتجلاو تسولو فين حطيتي ساروت يقوليك شكون عقل المهم الذاكرة تاتمشي.

اوا الايثانول تايتقل كاع العمليات ديال الجسم من خلال تعطيل السيالة العصبية تا المخ متاتوصلوش الطاقة لي خاصاه باش يخدم مزيان و بالتالي بنادم متايبقاش يفكر بطريقة سليمة و يقدر يتاخد شي قرار خاطىء لي يندم عليه من بعد و هو مكانش حاس بيه اصلا.

واش الايثانول غي هادشي لي تادير صف ؟

لا طبعا كدلك كاتسبب فالافراز ديال مجموعة من الهرمونات فحال الادرينالين ( هرمون ديال الحماس و الخلعة و الجهد ههه الى خلعك شي واحد ولا تفرجتي فشي فيديو ديال التحفيز ولا سمعتي هضرة تايتفرز)

و الكورتيزول السلامة يا ربي شحال متانحملوش هدا الهرمون ديال الضغط و الكآبة و الاجهاد. و تايتفرز تا دوبامين هدا محبوب الجماهير هدا هو السعادة بعينها هدا هو المتعة لي تانحسو بيها فاي حاجة كانستمتعو بها فهدا هو الهرمون ديال المتعة باختصار داكشي علاش سكايري تاينشط هههه .

الايثانول تايقمع واحد الهرمون اخر سميتو antidiuretic hormone هادا هو الهرمون لي تايخلي لماء فداخل ديالك و متايخليكش تخرجو كامل على شكل بول مكاتبول حتى تايكون عندك فائض فلماء فالجسم ديالك اولا عمر داك الماء بالسموم و خاص لجسم يتخلص منو المهم ماعليناش هاد الايثانول تاتقمع هاد الهورمون و متايبقاش لحصار داكشي علاش غالبيتهم منين تايسكرو بزاف تايبولو فحوايجهم هههه.

و حاجة اخرى دب دوك المستقبلات لي قلنا تايبلوكيهم فدماغ كاينين فواحد المنطقة فدماغ هي لي مسؤولة على الحركة و العضلات اوا منين تاتبلوكة ديك المنطقة السكايري تايدير شي حركات بهلوانية عالام ههه حيت متايبقاش قادر يتحكم فعضلاتو بشكل عادي.

و تا داك تقولية فلهضرة راه سبابها عدم التحكم فالعضلات.

اشناهوما المخاطر الصحية ديال الكحول؟

على الدماغ:

اخر الدراسات العلمية تبتات بلي الناس لي تايشربو الخمر بكيفية مفرطة دماغ ديالهم تايولي اصغر بنسبة 1.6% هادشي للرجال اما النساء فتايولي اصغر بضعف

ديال هاد نسبة اي 3.2 % .

على الشعر:

من خلال البول بدون توقف الجسم تايفقد لعديد من المعادن كالزنك مثلا و العديد من الفيتامينات b و c و لي مهمين باش يكون عدنا شعر قوي.

زيادة افراز الاوستروجين (هرمون الاناث) هاد الاوستروجين منين تايتفرز بكترة الشعر تايطيح.

على الكبد:

الكبد هو العضو لي مسؤول على تخليصك من سموم الجسم تم فين كاينين الانزيمات و هوما فحال الى قلتي شي مقص منين تاتاكل نتا شي وجبة فيها عناصر غدائية تايقطعوها هاد الانزيمات باش يسهال الامتصاص ديالها من طرف المصران باش من بعد دوز للخلايا يستافدو منها. و بالاضافة الى دلك الكبد تايساعد فالهضم و الحفاظ على مستوى الكوليستيرول فالدم تابت . المشكل هو ان خلايا الكبد خاصها الوقت بزاف باش تجدد الخلايا ديالها و فاش تاتحاول الكبد تخلصك من الايثانول و تنقص نسبة ديالو من دم تايموتو ليها الخلايا ديالها و كيما قلنا تايخصها الوقت بزاف بزاف باش تعاود تجدد اوا ناس المدمنين على الكحول مشات ليهم الكبد كاتكال و ماتاتبقاش الشهية و الوزن تاينقص و العياء و الارهاق الدائم و الافرار فالعينين و التهابات فالمفاصل و التقية بدم و الفضلات تاهوما بدم.

كلمة ختامية:

اولا بغيت نقول لكاع ناس المدمنين الله يعفو عليكم يا رب فهاد النهار حيت من غير الاضرار الصحية ديال هاد الخمر كاينين اضرار اخرين بزاف اجتماعية و بالخصوص للابناء لي واليديهم تايشربو تايتكرفصو بزاف و تايحسو بواحد الالم داخلي كبير و ماغادير يكبرو سويين نفسيا ماتخايلوش قداش المعانات لي تاتواجهك منين تايكون عندك شخص من عائلتك تايشرب و خصوصا الاب ديالك ، حيت فالاخير صحتو تاتهلك و كل اعضاء جسمو تايموتو شيئا فشيئا و نتى تاتشوف هاظشي و ماقادر دير والو واحك تاثير نفسي و عداب نفسي مؤلم بزاف ، نداء لكاع الاباء الى كنتو تاتبغو وليداتكم بصح فبعدو على داكشي . و تا ناس لي مبليين دب راه ماغاتستافد والو ا حبيبي ماشي بضرورة تسكر باش تنشط ، ديك طريق ما فيها ضو فاخرها كون راجل ، لوقت صعيبة اه لوقت كاتفشل اه ولكن حاول دير نتا داكشي لي متاديروهش ناس العاديين باش ماتعيش عيشة ناس لعاديين . تقاتل و دير جهدك و حاول تغير حياتك حيت كلشي بيديك و التوفيق من الله تعالى، و ناس لي لاباس عليهم و ماخصهوم تا خير و تايشربو شراب واش لباس عليكم كلشي مزيان راكم نكحتو لوجيك من كاع الجوانب ناس المزلوطة نقولو عندهم عذر واخا عذرهم واهن و نتوما يا كحال العفطة يا عيفت رجال تسحاب راسك واعر تاتسكر زعما هههه غي تاتضحك الله يعفو عليكم . نزيدكم غي معلومة اخرى و نمشي عندك م اغلى شراب واخا يدير مليون راه فيه الايثانول و دير هادي فدمغاك لايسحاب ليك تاضرب قرعة بمليون يسحاب ليك مطفرو هههه يله شباب خليت ليكم راحة فموضوع جديد الله .