فوائد خميرة الحلوى (بيكاربونات الصوديوم)
ابتداءا من هاد النهار اتولو تستعملو خميرة الحلوة لبزاف ديال الحويجات حيت عندها منافع صحية عديدة جدا و استعمالات متعددة لي غاتنفعكم فحياتكم اليومية ؟
 |
| فوائد خميرة الحلوى (بيكاربونات الصوديوم) |
اشناهيا خميرة الحلوى؟؟
اول حاجة خصكم تفرقو بين خميرة ديال الخبز لي هي عبارة عن خلايا حية و بالضبط نوع من الفطريات لي الاسم ديالو العلمي Saccharomyces cerevisiae لي هو واحد نوع ديال الفطريات احادية الخلية تادير التخمر و لي هو واحد المسلك تاتستعملو الخلية باش تخرج طاقة من السكر بسرعة يعني تاتشد السكر تاتفرتكو و تاينتج على هاد التفرتيك الطاقة و واحد المادة لي هي الحمض الكحولي او لالكول . منين تشم لعجينة اتلقاه و كدلك واحد الغاز لي هو تنائي اوكسيد الكربون CO2 و لي تاينفخ لعجينة و تايدير فيها الفراغات.
اما لخميرة دلحلوة فهي عبارة عن مادة كميائية مركبة فيها بيكاربونات الصوديوم bicarbonate de sodium لي هي مادة قاعدية و مواد حمضية فحال اسيد تاختخيك acide tartrique و پيرو فوسفاط دو صوديوم pyrophosphate de sodium و بالاضافة للنشا amidon . اوا يا سيدي منين تايكون لماء تايحدت واحد التفاعل بين الحمض و القاعدة و لي تاينتج عليه واحد الغاز لي هو تنائي اوكسيد الكربون ، و هو لي تاينفخ الحلوة ، اما النشا فهي غي متبت و صف.
واش هاد البيكاربونات هادشي لاش صالحين صف ؟؟
لا يا صديقي عندها منافع و استعمالات عديدة جدا سواءا الصحية الجمال و الحياة اليومية و العديد و العديد من المزايا نخليكم تكتاشفوها:
قرحة المعدة: قرحة المعدة هي منين تايطلع داك الخليط الحمضي لي عندك فلمعدة و تايوصل تال المريئ لي هو تيو لي جامع بين الفم و المعدة ، اوا بما ان بيكاربونات الصوديوم مادة قاعدية فهي تاتنقص حمضية المعدة و تاتحيد الحرقة. غاتشد معلقة صغيرة ماكاملاش ديرو فكاس دلما ديال القهوة و شربو شويا بشويا باش ماتصدمش المعدة و غاتحيد ليك الحرقة.
صحة الفم: احسن غسول للفم و غير بعشرة دريال ، تاتوصل تال بين السنان ، و تاتقتل الميكروبات و تاتحيد بقايا الطعام. غاتشد شويا لبودرة ديرها فشي معلقة و دير فوق منها شوي دلما. تولي عجينة و حك بيها السنينات ، غايولو يشعلو. و باش تعرفو كتر على هاد الموضوع ديال تبيض الاسنان شوفو الموضوع السابق غاتلقاوه فالصفحة او الموقع ديال اخبرني. و تا فمك الى كان طايب من داخل، استعملها كغسول للفم يوميا تايمشي منك.
رائحة العرق: اول حاجة راه العرق ماعندوش ريها هادوك غي الميكروبات لي عندك تم تايشدو الجلد الميت .و المواد لي تايخرجو مع العرق و تايخمر داكشي و تاينتج عليه تكون احماض، و تاشم الحموضة، اوا يا سيدي بيكاربونات تايتفاعلو مع داك الحمض و تايقمع ديك ريحة الحامضة ، شد شويا ديال الخميرة ديرها فالابط ديالك و غاتلاحظ الفرق.
لدغات الحشرات و حكة الجلد: منين تعضك شنيولة شد شويا دلخميرة دلحلوة مع شوي دلما دير منهم عجينة و دهن بيها المنطقة المصابة.
الجلد الصلب: منين تانتمشتو بزاف او تانخدمو يدينا و رجلينا تايتكون فيها واحد الطبقة قاسحة ديال الجلد ، اكدت الدراسات ان الى درتي رجليك فشي بانيو فيه الما و البيكاربونات تايرطاب داك النسيج شيئا فشيئا.
الكلى: صدق او لا تصدق قريت واحد البحث مؤخرا دارو واحد الدراسة على مجموعة من الناس لقاو دوك لي تايستاهلكو الخميرة دلحلوى اقل عرضة للاصاب بامراض الكلى.
رائحة كريهة فالثلاجة: عندها واحد القدرة على التفاعل مع الروائح و بالتالي تايحدو من الثلاجة ، او تا الى شريتي الثلاجة اول مرة تاتكوم فيها واحد الريحة خايبة ، شد شي طبسيل صغير خوي فيه شي جوج خمارات ولا تلاتة و ديرو فثلاجة غاتمشي ديك الريحة.
منظف للمطبخ و المرحاض: احسن و ارخص منظف تقدر تشتعملو و تخيد بيه البقع و الاوساخ و تقتل بيه الجراثيم. فران ميكرويف سخانة الماء الرخام المهم كلشي كلشي تقدر تنظفو بيها شد الخميرة و زيد لها شويتوت دلما تاتولي عجينة و فرك مزيان ديك البقعة لي باغي تحيد او الوسخ.
تنظيف الخضر و الفواكه: لتعلم يا اخي انك الى ماغسلتيش ديسير و الخضرة بالخل او الصودا فانت تاتلوح راسك لسرطان و نتا ساد عينيك. حيت كاع لفواكه و الخضر و بدون اسثناء ، عامرة بالموبيدات و لي هي مواد مسرطنة و مدمرة لدماغ بامتياز.
الحراق ديال الماعن: شد صودا و الما و ديرها فلبلاصة المحروقة و طيبها فوق لبوطة مشى الحراق ههه.
اطفاء الحرائق: اياه اياه ا عمو من بين المواد لي كاينين فطفيات ديال العافية هي الصودا و لي تاتفعل مع الحرارة و تاينتج عليها غاز co2 لي تايطفي العافية، كيف تاتعرفو باش طفى العافية خاصك تحبس عليها لوكسيجين ، و تخنقها ب CO2.
الاعشاب الضارة و الفطريات: بلاصة ماتستعمل مبيدات و تخرج على صحتك استعمل الصودا ولي غادي دير واحد الوسط ديال الصوديوم مرتفع الشيء لي غايقتل الاعشاب المضرة و الفطريات.
رائحة الحذاء: يمكن ليك تستعملها باش تحيد رائحة الصبابط الكريهة , و قلت ليكم بلي الصودا عندها قدرة كبيرة علا التفاعل مع الروائح و تشدها و ماتخليهاش مزال ترجع للهواء.
كلمة ختامية:
كيف شفتو الخميرة دلحلوى او بيكاربونات الصوديوم عندها استعملات بزاف وومهمة بزاف، و مزال انا دكرت ليكم غي شي وحدين مزالين بزاف غي هادو جاوني مهمين و غاينفعونا و حبيت نشاركهم معاكم، الا عجبكوم الموضوع ماتنساوش تبارطاجيوه مع صحابكم باش يستافدو تا هوما ، و باش نخلقو مجتمع مثقف، و علمي ، و تايقرى بعيدا عن الترهات و الخرايف و الفضائح و الاخبار لي تا ضر فراس ههه نشوفكم عما قريب فموضوع جديد 😊
great bro
ردحذف