شرح مفصل لمرض الربو

تقديم

سلام الله عليكم شباب، كي ديرين لباس عليكم نتمنى راكم بيخير و ناشطين ماشطين واخا شاك فهاد ماشطين مع هاد الحجر الصحي هههه.

ضروري فحياتنا تصادفنا مع شي شخص مريض بالديقة و تاتشوفيه مسكين محناه ديك الديقة و تاتسبب ليه مجموعة من المشاكل. ولكن واش عمرك تسائلتي شناهيا ديقة اصلا و كيفاش تا كايتخنق لواحد و كيفاش تايظهرو دوك الاعراض عندو يعني شنو المسببات ديالها؟؟؟ اوا تبع معايا مزيان و خرج عينيك انا غادي نشرحي ديقة بطريقة علمية مبسطة ههه.

الموضوع: الديقة

كيفاش تانتنفسو؟؟

الانسان منين تايتنفس تايدخل الهواء عبر القصبة الهوائية و منين تايوصل للرئة تايتلاقا جو قصيبات وحدة تادي للرية ليمنة و وحدة كادي لرية ليسرة، اوا يا سيادي و يالمشاهدين ههههه من بعد تاتوصل لرية و هاد رية اصلا هي مجموعة من التفرعات تاني ديال بزاف دلقصيبات صغار، متفرعة متفرعة تا شادة رية كلها و فالنهاية ديال كل قصيبة كاين واحد صاك صغيور و دايرين بيه العروق الدموية، تم فين تايدخل الاوكسيجين للدم و تايخرج تنائي اوكسيد الكربون، منين تاندخلو لهوا تاناخدو لوكسيجين و باش ندفعو تنائي اوكسيد الكربون كاين واحد الجلد تحت رية كاتبقا تجبد منين تاندخلو لهوا و تادفع تاني دايرة كي لبلان ديال جباد كاتجبد و كاطلق.

اشناهيا الديقة؟؟

نقدر نقوليك بلي ديقة هي مني الجسم ديالك متايكونش عند مع شي حاجة فحال دب نتا كايكون عندك مع شي ناس و. شي ناس لا، و دوك ناس لي متاتحملش تادابز معاهم و تايسلخو باباك ههههه اوا تقريبا نفس شي المسالك التنفسية تايكون متايحملوش شي حاجة فحال الغبرة و لا حبوب لقاح و لا زغب دلحيوانات ولا الهواء البارد، روايح، الدخان، بعض الدوايات ..... و زيد و زيد من الحوايج، غي تايحس بيهم تاينوض تاهوا يبغي يدابز و يبدى يفرز فشي مواد لزجة فدوك المسالك الهوائية تايسحاب راسو مطور بغا يحارب داك الجسم الغريب لي دخل بمضادات الاجسام ، المهم راه المناعة ديالنا لي تادير هادشي نهههه ، اوا منين تاتفرز ديك المادة اللزجة كايتسد دوك لمسالك و شخص لمصاب مسكين متايلقى فين يتنفس مزال، و هادشي غايدفعني ندوي على الاعراض يله يله فيقو معايا باقي لخير بقا مخرج عينيك كيف لول نهههه.

شناهيا اعراض الديقة؟

-الكحة مجهدة: اصلا الكحة هي منين الجسم تاتكون شي حاجة لاصقة فلمسالك التنفسية و تايبغي يخرجها منو بزز.

-طاقة ناقصة: حيت ماشابعش الجسم اكسجين ماغايكونش عندو باش يتحرك.

-التنفس السريع: تايبغي مسكين يدخل لوكسيجين بالزربة حيت عندو خصاص.

-ضيق التنفس: اصلا القصبات مبو شيين.

-ضعف و التعب: كيما قلنا الجسم تايحتاج ضروري يشبع اوكسيجين سينون ماعندوش كيف يخدم بلا بيه.

-تشنج عضلات الرقبة و الصدر: دوك العضلات مالفين تايشبعو اكسيجين و هوما لوليين تحرمو منو.

-تصفار اثناء التنفس: صفارة اصلا هي واحد الانبوب مغطي فيه واحد نسبة اوا راه نفس الشيئ بالنسبة للقصبات الهوائية الممثلئة بالمخاط او ديك المادة اللزجة لي دوينا عليها.

التهاب المسالك التنفسية: فينما تسمعو الالتهاب فشي بلاصة الا و راه فيها مشكل و الجسم ديالنا و بالضبط الدم و بالضبط الخلايا المناعية اولا الكريات البيضاء مجموعين تما منوضين الحرب مع الجسم الغريب لي دخل يعني ديك لبلاصة تاتنفخ و تاتحمار و تاتسخن حيت نايضة الحرب ههه.

علاج الربو:

و هو صراحة شي علاج فعال و دقة بطلة كيما تانقولو مكاينش ولكن كاينين حويجات تايخففو من نوبات و تايمنعو دوك الاعراض لي قلنا و غاندكر ليكم غي شي وحدين باش تكون عندكم فكرة و صف.

الكورتيكوستيرويدات: corticoïdes : عرفتو داك الجهاز ديال الديقة لي كايديروه الناس لي مراض بالديقة راه هرمونات هادوك تاينقصو من الالتهاب شوية بشويا لواحد المدة طويلة. ها هوما اهم دوك الهرمونات:

Beclomethesone (QVAR)

Budesonide (Pulmicort)

Fluticasone (Flovent)

المهم من لخر كاينين بززاف ديال العلاجات ولكن لي بغيت نقول هو انها غي تاتخفف من الاعراض و كاتنقص الالتهاب و صف اما باش تعالجو نهائيا فهاد شي تاياخد لوقت بززاف و مامضمونش مية فلمية.

كلمة ختامية:

فكر اننا شدينا و خشينا ليك راسك فلما و ما قديتيش تنفس باش غاتحس، غي فكر شويا اوا راه ناس لي فيهم ضيقة منين تاتجيهم نوبة راه اكتر بكتير من داك الاحساس، لهدا الله يخفف على كل مريض اسقامو و يشافيه من كل داء يا رب، اما ناس لي مامراضش راه ديقة ديالنا حنا هي لحزقة و قلت لفلوس هههههه تا هي تاتخليك مخنوق و ماقادرش تنفس ههههههههه.

الا كملتي معايا تال هنا خلي ليا شي تعليق زوين نعرفي المتابعين ديولي الاوفياء و بارطاجي الموضوع باش ناس اخرين يستافدو و تهلاو تانتشاوفو فموضوع جديد باذن الله .