دردك لتكبير الأرداف و المؤخرة

الموضوع: كيفاش لبلان ديال هاد دردك؟

لا شك ان فرحلتك باش تزيدي لوزن و تحصلي على مؤخرة كيم كردشيان و ارداف مريم فارس سمعتي بهاد الموصيبة تاع ددردك و بانها تااتنفخ و و غاتخليك تحصلي على جسم الاحلام اوا اجي نشرح ليك الموصيبة اشنو تادخلي لصحتك باش تعرفي مزيان و تقرري الى كنتي غاتشتاعملي داك العجب مرة اخرى ولا لواه و تا. باش تشرحي لشي حمقة تا هيا الى باغا تجرب داكشي.

دردك لتكبير الأرداف و المؤخرة

ها واحد السلام عليكم شباب كيفكم ان شاء بخير و بصحة وسلام ليوم موضوعنا على دردك هاد الدواء العجيب ليي تايقاد لفورمة و لي الى كليتيه غاتولي شهوة منك و كلشي. غايتكجكج عليك فحال دبان و يجو لخطاب البايرة هههه اوا الله يعطينا وجهك اجي تفهمي دردك اشناهي بالضبط ؟ و شنو تأثير ديالها على جسم الانسان؟

اشناها دردك؟

دردك ا سيادنا عبارة عن هرمونات مصنعة و لي بغى يفهم لبلان ديال الهرمونات راه كاتب موضوع على الهرمونات غاتلقاوه فلموقع ديالي ولا فالصفحة فحال فحال المهم بشكل مبسط لجسم ديالك تايتحكمو فيه الهرمونات، اوا ا سيادنا دردك عبارة عن هرمونات و بالضبط كورتيكويد corticoïdes هاد الكورتيكويد عبارة نيت عن هرمونات غي هوما تايصلاحو كمضادات للاتهاب، باش تفهمو اشناهيا مضاد للالتهاب تبعو معايا مزيان هادشي لي غانشرح شتي لجسم ديالك منين تاتبان ليه شي حاجة ماشي هي هاديك كايدخل باش يفرتك جقلة و يصلح الامور كيفاش هاد الالتهاب دب مثلا تجرحتي ياك و دخلات شي جرتومة لديك جرحة كايجو لعسكر ديال الجسم ديالك لي هوما الخلايا المناعية لي كايحاربو اي حاجة غريبة على الجسم ديالك باش يخلو عشة باباها ديك الجرتومة اوا يا سيدي فديك لبلاصة لي تجرحتي فيها تاتحمار و تاتنفخ ووتاتكيح هادا هو لي سميتو التهاب يعني ديك جرحة نايضة فيها الحرب بين الخلايا المناعية و الجرثومة هدا هو التهاب غي حالة من الحالات طبعا كاين حالات اخرة ديال الالتهاب المهم اسيدي الالتهاب هو واحد الاستجابة ديال الجسم ديالك لشي حاجة ماشي هي هاديك فشي بلاصة معينة او الجسم كامل فحالة الحساسية مثلا حيت الحساسية ما هي الى استجابة مناعية مفرطة منين تاتدخل شي مادة نتا محسوس منها لجسم ديالك من داخل كامل الخلايا المناعية ديالو داخلين فلحرب معاها باش يهنوك منها، المهم هادا هو الالتهاب ا سيادنا ، المهم الكورتيكويدات (نوع من الهرمونات) الجسم تايفرزهم باش منين يحس بلي صف الخلايا المناعية ديالك قضاو الغرض و المادة مابقاتش تايتفرزو باش تحبس ديك الاستجابة او الالتهاب و يرجع الجسم للحالة الطبيعية ديالو . و كدلك الكورتيكويد كايوصفهم الطبيب لمرضى الربو ( الديقة) و الحساسية.

الحساسية شرحتها قلنا هي الاستجابة او محاربة الجسم من خلال خلاياه المناعية لشي مادة غريبة ولا شي جرتومة. و الربو او الدييقة فهي منين المسالك الهوائية تايضياقو بسباب الانتفاخ ديال دوك الخلايا لي تايشكلو داك التيو لي تايدخل الهوا للرئة و تايفرز واحد المخاط لي تايسد دوك المسالك الهوائية و بالتالي كايصعاب التنفس اوا ا سيادنا راه هاد الديقة ما هي الى التهاب المسالك الهوائية ديال الرئة. و بالتالي الطبيب تايوصف هاد لكورتيكويد لهاد الناس لي مراض باش الالتهاب ينقص و كايتسماو مضادات الاتهابات. و كنتيجة او اعراض سلبية تايغلاضو هاد ناس و تايجمعو الشحمة فالجسم ديالهم. واش سمعتي المسخوطة ناس لي مراض ا عباد الله ناس لي مراض هههه. اوا راه دردك عبارة عن هرمون صناعي من نوع كورتيكويد و بالضبط هي ديكساميتازون هرمون صناعي طبعا.

امم و شنو التأثير ديالها على الجسم ديالي؟

خاتنفخك ليك المؤخرة و الفخاض هههه المهم الى عندك زهر طبعا حيت فالغالب الشحمة الناتجة عن دردك تاتجمع فالكرش و فلوجه و الكتاف يعني بلاصة ماتقادي لفورمة غادي تولي كي لهيشة و الى كانو الجينات ديالك مزيانين غادي يتنفخو ليك الفخاض و المؤخرة الى كانو و هادي نادرة بزاف هههه. دب غاتنوض شي وحدة تقولك اوا انا نجرب اش خسرت ماتعرف نكون انا من هادوك لي تصدق ليهم، تبارك الله على دادة لفاهمة لواه ا بنتي مزال ما ساليت قلنا بلي هاد لكورتيكويد مضادات ديال الالتهاب و واحد من الطرق ديال هاد محاربة الالتهاب هي النقصان من الاستجابة المناعية يعني تاتقتلي الجهاز المناعي ديالك واش تاتعرفي خطورة هاد الكلمة ولا لا واش عرفتي شحال مكالي عليك هاد الجهاز ولا لواه . فراسك بلي جرتومة بسيطة لي فالطبيعي ماشي خطيرة و دخلات لجسم ديالك كفيلة بانها تهلكك مزيان و تسبب ليك امراض خطيرة بزاف تقدر تأدي للموت ديالك كاع. اياه اياه لموووت ا لالة، شتي الى غي لفيروس ديال زكام لي نورمالمون عادي غادي يقدر يقتلك اياه ا بنت ناس ، المهم بالاضافة لارتفاع ضغط الدم او تونسيو لي هي القوة او السرعة باش تايمشي دم فلعروقة لي خاصها تكون بواحد الكمية محدودة باش الخلايا تاخد من الدم الغداء و الاكسيجين لي خاصها و طرح الفضلات ديالها تخايل معايا فحال شي وزين دايز فيه واحد طبلة متحركة ديك الطبلة دايزة فيها ماطيشة و الخلايا هوما دوك العاملات تايعزلو ماطيشة زوينة و تايحطو ماطيشة لخايبة الى كانت السرعة ديال ديك الطاولة المتحركة كبيرة ماغادي يقدرو ياخدو ماطيشة زوينة وتا ماغاديش يقدرو يلوحو ماطيشة لخايبة ههههه المهم نتمنى فهمتو ضغط الدم و الارتفاع ديال اوا الى ماتخلصاتش الخلية من الفضلات و استافدات من الاوكسيجين و التغدية لي كاينة فالدم و كان تايمشي بالزربة فغادي تموت ديريكت. التعاطي لكورتيكويد تايضعف لبنكرياس و بالتالي مع الوقت يولي فيك ضيابيط او سكر بالدارجة. زوينة هادي عند المغاربة فيك السكر فيك الملحة ههههه المهم مرض السكري من لخر.

عاد مني تاتعاطى لاي نوع من الهرمونات الصناعية فالجسم متايبقاش ينتجهم طبيعيا حيت قلنا لجسم ديما تايحاول يحافظ على التوازن الداخلي ديالو و ملي نتا تادخل ليك دوك الكميات الجهنمية ديال ديكساميتازون او دردك فالكورتيكويد تاهوما تاتقمعهم و بالتالي تخربيق داخلي بكل ما للكلمة مم معنى.

بالاضافة لانك معرض للسمنة و نتوما عارفين المخاطر ديال السمنة الله يحفظ.

و عاد الحاجة الاخير ديك الشحمة لي غاتجمع الى ماصدقاتش ليك فعولي على واحد لوجه فحال الخبزة و شي كتاف و شي جناب و كرش يااااع ههههه تصدقي بلاصة ماتكحليها عامياها ههههه.

كلمة ختامية:

كنت دويت فالموضوع ديال اختلال الهرمونات على ان الجسم كايتعامل بشي حاجة صغر من الغرام بمليون مرة يعني غرام0.00000001 شويا طالع ولا ناقص قفرتيها واش نتي تاتعرفي الكمية لي تاتستاعملي فداك الفانيد او لقويلبات او او راه واحد الكمية خيالية تقدر توصل نص تال 5 غرام واش ا عباد الله عرفتي اشناهيا خمسة غرام هههه الموت البطيء و خراب الجسم التام .

الطبيب منين تايوصف دوا ديال الحساسية للمرضى ديالو تايوصفو ليهم بميليغرام و مزال من مصدر موثوق و مع دلك خطير على الصحة. فمابالك بزبالة ديال الكونطر بوند و العشابة . الحاجة لي ما عندها تا اساس علمي . و للامانة كيم كارداشيان تاتستعمل فحال دوك الهرمونات كورتيكويد ولكن متبعها طبيب تجميلي و طبيب خاص لي تايوصف ليها كميات بعد دراسة و تحاليل معمقة و منين تايبانو اثار جانبية تايحاربوهم عادي جدا و تا الى تجمعات ليها الشحمة فشي بلاصة مابغاتهاش كادير ليها الشفط و ديها فين بغات و شحال ديال التقويم و زيد و زيد.

كاخر حاجة غانقولها لي عطاها ربي شي حاجة بصحتها و لي ماعندها شاي و باغا تزيد فلوزن بطريقة صحية و تقادي فورمتك فمن حقك طبعا ولكن بطريقة صحية و علمية الله يرحم واليديك و فوتي عليا الفانيد و قويلبات صحراوى هههه اول حاجة ايخصك تقراي الموضوع لي درت على زيادة الوزن باش تعرفي تحسبي سعراتك شوفيه باش تفهمي و تاني حاجة ايخصك ديري سكوات و تمارين للافخاض و المؤخرة راه سكوات بوحدها مادايرة والو راه عضلة المؤخرة فيها ربعة العضلات كل وحدة خصك تخدميها من جيه و الفخاض كدلك ربعة العضلات لي فيها خصك تخدميهم كاملين باش تحصلي على نتائج مزيانة . باش ديري هاد تمارين و تبعي نظام غدائي صحي و تحصلي على النتائج لي بغيتي ماغاتحتاجيش تمشي لاصال او شي حاجة غي قراعي دلما و البيدوات تاع خمسة لتر و شي بيت خاوي و خدمي ليا مع راسك المهم دخلو لصفحة باش تفهمو مزيان لبلان ديال السعرات.

اه و صحاب لاعنداك ا ختي خاصك تقبلي راسك كيف نتا بعيوبك اشوا تاترون واش نتا مريض فمخك ا صاط ههههخ بلعكس تماما خاصك مني تعرف الاشكال او العيب خاصك طور و تحسن راسك للافضل دائما ماشي نتا مكلخ تقبل على راسك مكلخ او مشحم و تقول انا قابل راسك ننننن بلعكس تمام لحوايج لي بين يديك و تقدر تبدلهم فبالي يا اخي لعمر قصير حسن و طور نفسك عقليا جسديا و ماديا و يكون فيك حب تحدي فباش حسن منك ناس لي كانو غلاض و ضعافو او ناس لي رقاق و وصلو لجسم الاحلام ديالهم الى الخدمة تم الخدمة تم الاصرار و الرياضة دمتم يا شباب متألقين .

Let's be the best version of our selves.

يله نكونو افضل نسخة من انفسنا.