كل ما تحتاج معرفته عن ANAPEC

ANAPECكل ما تحتاج معرفته عن  

ما هي انابيك؟ دورها ؟ مميزاتها و عيوبها؟ لا شك في طريقك فالبحث عن عمل, سمعتي او صادفتي شي خدمة بعقد انابيك, ولكن ما عندكش معلومات عليه; فهاد الموضوع كتبت اهم المعلومات لي .
خاصك تعرف على هاد العقد, نتمنى تعم الاستفادة

كل ما تحتاج معرفته عن ANAPEC 

 ?ANAPECشناهيا وكالة 

هي الوكالة الوطنية لانعاش الشغل و الكفاءات, و لي هي واحد الوكالة عمومية ديال الدولة, تحت اشراف وزارة التشغيل, الدور ديالها التكلف بامور التشغيل ديال الشباب المغربي, و التوسط ليهم باش يخدمو, و جميع الخدمات ديالها فابور فابور فابور الى مشيتي عند شي وكالة و قالك انقطعو ليك شي حاجة دير فيه ديك شوفة ديال من نيتك ا صاط ههه المهم راه فابور فابور فابور تانعاود نقولها. 

?ANAPEC اشناهوا الدور ديال هاد 

الدور ديالها هو الوساطة بين المشغل (الشركات الخاصة) و نتوما اصحاب ديبلومات و الشهادات (التاسعة،الباكdeug, الاجازة.... شواهد التكوين المهني و شواهد مشابهة) في اطار ما يسمى ببرنامج ادماج لي دارتو الحكومة المغربية باش تخدم الشباب و داكشي ههه.

 ?CONTRAT ANAPECاشناهيا  

قبل مانشرح ليكم هاد الكونطرا اجيو ندويو على الكونطرات العاديين هوما لولين;

CDD/CDI

بالعربية تعارابيت كونطرا محددة الزمن. يعني يديرو معاك واحد المدة محددة فحال عامين مثلا, و ديك ساع الله يعاونك ولا يجددو معاك العقد (CDD) و الكونطرا لاخرا هي ديال ديما( CDI) حتى لتقاعد ولا يدي مول لامانة امانتو ههه المهم هاد الكونطرات هوما العاديين لي كانو وفهاد الكونطرات بكل بساطة فيها مجموعة من الالزامات و التكاليف لي تايخلصهم عليك المشغل بحال الاقتطاعات ديال cnss الضمان الاجتماعي و  TFP :taxe de formation professionnelle 

لي هي الضريبة على التدريب العملي اياه ا سيدي الدولة المغربية تاتبتاكر شي سميات فشكل فالضرائب ههه المهم ماعليناش و بالنسبة ليك نتا تاقتاطعو ليك من الخلصة ديالك cnss و IR لي هي الضريبة عن الدخل دب عرفنا الكونطرا العادية اشناهيا و كيف دايرة.

?ANAPECاشناهيا مميزات عقد 

اولا نتفاهمو من اللول نتا مني غاتخدم بعقد انابيك فنت مجرد سطاجير, تايتعلم المهنة و تايتخلص اوك يعني نتا الى كنتي غادوز سطاج فابور واحد المدة فاحسن ليك دوزو بعقد انابيك بينما نيت تفورما مزيان و تعلم الحرفة ههه زعم المهنة كيفما بغات تكون ادا هادي اول ميزة سطاجير و تاتخلص. 

تانيا: ماتاتخلصش IR و CNSS اتقولي و الا وقعات لي شي حاجة انقوليك حكها فجلدك هههه لا لا كاين واحد نظام ديال AMO التغطية الصحية الاجبارية متاتخلص فيه والو و تايوفرو ليك عقد انابيك. 

اوا بالنسبة المشغل فهو معفي من كاع دوك التكاليف و الاقتطاعات لي قلنا فلول. 

?واش  هاد العقد عندو عيوب 

طبعا تا حاجة ما كاملة الكمال لله اي حاجة واخا تبان ليك فالحياة مزيانة, عرف راه كاينين الكوارث ضروري ههه المهم فيا الهضرة بزاف ههه .

اولا: خاصك تعرف  ان عقد انابيك فيه عامين كحد اقصى و تايسالي تلقائيا ديك ساع يا تايجددو معاك العقد و هاد المرة كونطرا عادية, اولا تاتمشي فحالك تقلب على راسك, المهم اسيدي نفتارضو خدمتي بعقد انابيك لمدة اقل من 6 شهور و خرجتي فعندك لحق تستافد من عقد انابيك مرة اخرى بكاع المميزات ديالو ولكن الى فتي 6شهور فالخدمة فصف مابقاش عندك الحق فعقد انابيك سير كمل مع الشركة لي خدماتك ولا قلب على راسك بلاصة اخرى المهم تكونتي.

تاني عيب هو انه فاي وقت يقدر يجري عليك المشغل و هادشي كاين فلكونطرا فحالة الى بنتي ليه مامناسبش ولا ضبر ليك على سبة هههه و كيما قلنا تا نتا تقدر تستقل وقتما بغيتي هادشي كامل فلكونطرا المهم بالنسبة لعلاش مايمكنش تستافد من عقد انابيك مرة اخرى انقوليك واش هوما غايبقاو يخلصو عليك ديما  دوك تاكاليف و تستافد من المميزات لا مايمكنش ما ضصروش هههه المهم العيب لاخر هو انه الحد ديال الاجور تايتراوح بين الف و ستمية درهم تال ستالاف درهم . كحد اقصى و الحد الاقصى ديال التشغيل كيفما قلنا عامين 

واش الانابيك هادشي لاش صالحة فقط ؟

لا ا حنيني مزال واحد جوج ادوار ولي تايبانو لي انا مهمين بزاف و ناس قلال لي تايعرفوهم صراحة 

اولا: التكوينات و الاعداد ديال اليد العاملة لواحد نوع ديال الخصاص فقطاع الشغل فشي مدينة محددة : كيفما تاتعرفو جميع لوكالات ديال انابيك كاينين فكاع المدن تقريبا و من بين الادوار ديالها انها مثلا الى كانت مثلا شي مدينة فيها شي قطاع ممشي مزيان مثلا قطاع صناعة الطائرات هههه واي واي فين مشيت المهم مهم تادير هاد الانابيك دورات تكوينية تاتكون فيهم الشباب لبحال هاد العمل هدا و هادشي فابور قالو ليك مصاريف ولا كدا كتب بيهم شكاية و دفعها الكوميسارية و تا الكوميسارية الى بداو تايتزوقو عليك راه كاين واحد الوكالة تانجيب ليكم سميات تاشكي بدوك اصحاب الكروش الكبيرة و غايتجررجرو مزيان المهم قلنا التكوين تايكون بالمجان ولكن ماشي بالضرورة ايخدموك منين يسالي التكوين المهم الى جاب الله كاين الطلب على داك البوسط لي تكونتي فيه غايعيطو ليك. 

الدور التاني لي هو احسن حاجة و افضل مايمكن ليك دير في هاد الحياة الى كنتي باغي الصرف و الفلوس و لي تاتعاونك فيها الانابيك و لي هي:

المشاريع و المقاولات الصغرى: بحيث ان الانابيك تاتوجه ليك ارشادات و نصائح و معلومات على كيفاش تنشىء مقاولة خاصة و كيفاش تبداها من زيرو واخا ماتكون عارف زاق على انشاء المقاولات غايوروك خاصك غي الفكرة و يعاونوك تا باش تلقى التمويل باش تنشأ المشروع ديالك واخا يكون صغير الانسان مافيها باس لي عندو فكرة مشروع واخا صغير يمشي لعند اقرب وكالة انابيك و يجلس معاهم و يقوليهم انا بغيت نصائح و ارشادات باغي نشأ المشروع ديالي و هوما غايشرخو ليك كلشي .

كيفاش نقدر نستافد من هاد العروض؟

 باش تسجل و تستافد من العروض لي تاتقدمها انابيك خاصك دخل هنا و تسجل دخل المعلومات لي طلبو منك و هانتا تساجالتي .

بالنسبة للوتائق لي غايخصوك باش تمشي دفع فعين المكان:

بطاقة التعريف الوطنية ؛

الديبلومات المحصل عليها ؛

الشهادات وشواهد التدريب؛

السيرة الذاتية.

:كلمة ختامية

 هدا رأي شخصي ديالي غانشاركو معاكم لي هو بالوظيفة و تكون صالاري ماعمرك تحلم تزيد لقدام فين عمركم شفتو شي موظف تايقوليك كلشي بيخيير و شايطة ليا واحد ربعين الف هاد شهر غانمشي نسافر بيها ولا نبرع بيها واليديا و عائلتي الصغيرة جامي تلقاها ديما تايوصل خمسطاش فشهر تايشكي خهههه لفلوس تسالاو مابقى عندي ريال و زيد و زيد من العبارات الشهيرة انا بالنسبة ليا الانسان خاصو ينشأ المشروع الخاص ديالو و حتى الى توظف مايكونش عندو الهدف ديال يبقى فديك الخدمة حياتو كاملة الى فحالة الى كان تايبغي خدمتو و هاد الحالة نادرة فالمغرب تاتقرى الفلك و تاتخدم فلفلسفة هههه و انما تكون غي مصدر قار يعيش بيه شويا و يجمع بيه راس المال يدير مشروع ديالو. عيينا من الدولة مادايرة لينا والو ماكاينة خدمة ماكاينة هادي اه متافقين على هاظشي كامل ولكن شنو اتبقى مربع يديك لا طبعا دمر و خدم فاشما كان جمع شويا دراس المال دير مشيريع بيعة و شرية شي حويجات هاكا عطى الله مايدار انشاء الله تعالى خاص غي بنادم يبدى و حاجة اخرى القراءة و الوعي هو سلاحك اي مجال غادخل ليه قرا عليه مزيان و الى متاتعجبكش القراءة تفرج ففيديوات و فالاخير ربي المستعان و الله يسر اموركم و امورنا و نتمنى الموضوع نال اعجابكم و لي عندو تساءل ولا شي حاجة مافهمهاش فلموضوع يخلي لي تعليق و غانجاوبو انشاء الله تعالى دمتم متألقين و للقراءة اوفياء.