زيادة و نقصان الوزن بطريقة علمية

الموضوع: زيادة و نقصان الوزن بطريقة علمية.

السلام عليكم شباب متابعي اخبرني كيفكم ان شاء الله بيخير و بصحة و عافية اذا موضوعنا ليوم هو كيفاش نفشو ناس المنفوخة و نفخو ناس المفشوشة بطريقة علمية بلا خزعبلات و الخوا الخاوي ههههه . لا شك ان الغلض او الرق مشكل عند بعض ناس و خاصك تعتابرو مشكل اصلا باش تكون افضل نسخة من نفسك اوا يا سيدي حاولتي بزاف دلمرات انك تنقص من الوزن ديالك او تزيدو و بقيتي كاتبع بزاف دلوصفات و التخربيق كول هادي غاضعفك كولي هادي غاتزيدك فلوزن. اوا بحكم انني انا اصلا عانيت من السمنة كانت فيا 103kg و نقصت وزني تال 72kg فظرف خمسة اشهر من بعد ما راكمت مجموعة من المفاهيم و الامور العلمية من خلال البحث ديالي الدؤوب حيت كنت متعطش باش نقص لوزن ديالي و نلبس لي بغيت فحالي فحال ناس هههه. اذا كيفاش نقدر نزيدو ولا نقصو الوزن ديالنا بطريقة علمية?

زيادة و نقصان الوزن بطريقة علمية

مفاهيم اساسية:

الجسم ديالنا داير فحال شي آلة خدامة بالوقود غي االفرق لي كاين هو ان الوقود ديال سيارة هو ليصانص اوا و حنا الوقود ديالنا هو الماكلة اوا ا سيادنا الوحدة ديال قياس الماكلة هي السعرات الحرارية كل نوع دال الغداء فيه واحد الكم ديال السعرات الحرارية . منين تاتشريو شي منتج عند مول لحانوت غاتلقاو فيك مثلا 300 كالوري ديك كالوري هي 300 سعرة حرارية . اوا راه اي نوع ديال الاكل عندو سعرات حرارية كاين لي مافيهش بزاف دسعرات بحال الخضروات و كاين لي فيه السعرات الحرارية بزاف فحال المقليات و الحلويات و زيد و زيد. دب فهمنا لبلان ديال السعرات الحرارية كيف داير . دب نتا باش تبقى عايش و الجسم ديالك يخدم و يدير الوظائف الحيوية ديالو فحال الهضم (يطحن ليك الاكل) و الرئة دخل لوكسيجين و الكلاوي يصفو دم و زيد و زيد خاصو واحد الكمية ديال السعرات لي خاصك دخلهم ليه فالنهار هاد الكمية تاتسمى BMR:basale metabolic rate يعني بالعربية تعارابيت معدل الايض الرئيسي يعني بالداجة معدل او نسبة السعرات لي تايحتاجها الجسم ديالك باش يدير الوظائف الحيوية ديالو لي كنا دكرنا . منين فهمناBMR لي هو معدل الايض الرئيسي اجي نعرفو واحد المفهوم اخر لي هو AMR:Activity metabolic rate يعني معدل الايض النشط يعني دوك سعرات الحرارية لي زايدين و لي تاتحتاجهم باش تمشى و تقرا تجري دير رياضة تمشي لخدمة تسيقي تجفي المهم هادا هو AMR . اوا اسيادنا الا كنتي باغي ضعاف خاصك تاكل قل من داكشي لي تاتحتاج فنهار ديال السعرات الحرارية و الى كنتي باغي تغلاض خاصك تاكل كتر من السعرات لي تاتحتاج فنهار . شفتو راه ساهلة بزاف يله نوضو على سلامتكم سالا الموضوع ههههه.

كيفاش نحسب الاحتياجات ديالي اليومية من السعرات الحرارية.؟

كي شفتو الامر مامعقدش بزاف غاتاكل كتر من ما كاتحتاج فنهار باش تغلاض و قل باش ترقاق معادلة سهلة.

دب كيفاش غانعرف شحال تانحتاج فنهار؟

يله تبعو معايا مزيان كاينين بزاف دلمعادلات باش تحسب احتياجاتك ولكن وحدة باش خدمت انا و خدمو بيها غالب الناس فالعالم هي ديال منظمة الصحة العالمية OMS : organisation mondiale de la santé لي هوما زوج معادلات وحدة ديال الذكور و وحدة للاناث.

الذكور: 

66+(13,7×......kg)+(5×....cm)-(6,8×....ans)=

كيف شفتو ايخصك.غي الوزن و الطول و العمر انعطيكم مثال:

شخص فعمرو 20 عام و طولو 170cm و وزنو 70kg غاتولي المعادلة كالتالي: 

66+(13,7×70kg)+(5×170cm)-(6,8×20ans)=1739 calories

الاناث:

655+(9.6×....kg)+(1.8×....cm)-(4.7×....ans) =

مثال:

وحدة عمرها 20 عام طولها 160cm و وزنها 70 kg دبدوبة هههه 

655+(9.6×70kg)+(1.8×160cm)-(4.7×20ans)=1587 

دب من بعد ما حسبنا.هاد الرقم لي هو BMR يعني معدل الايض الرئيسي خاصنا نضربو فالمعدل دالنشاط لي تانديرو يوميا AMR. الى ماكنتيش تاتحرك بزاف خدام فشي بيرو او معكاز ماتاتحركش من بلاصتك ماتادير تا نشاط لا رياضة لا والو غادي ضرب  BMR * 1.1 يعني 1739×1.1=1912 يعني قول تقريبا 1900 سعرة لي غاتخصك باش تبقى فديك لحالة لي نتا فيها يعني داك لوزن لي نتا فيه دب. المهم من بعد ماتحسبو لbmr ديالكم غادي ضربوه فهاد الرقم لي متناسب مع الانشطة اليومية ديالكم:

1.1 = كسول ماكاتحركش بزاف متاتسخرش مكاتمشاش بزاف ماكاتمارسش رياضة جالس فبيرو متاتشقى ما تا لعبة ( الى كنتي هكا غي سير تموت ههه)

1.2= المهم كادير نشاط ضعيف بزاف شوي دلحركة شي سخرة قريبة لدار شي اعمال خفيفة فدار فحال هكا تاترتب بيتك تاتغسلي ميعنات هكا بسيط داكشي .

1.3= تادير رياضة مرة فسيمانة و حركي مزيان تاتحرك بزاف تاتمشى المهم متاتكلسش بلاصتك ولا نيت شي حادقة تاتبرد لهوايش و كاتشقى 😍 ههه .

1.4= تادير رياضة ربعة تال خمسة دلمرات فسيمانة و نشيط و حركي.

1.5: الى كنتي نيت شي حراقية تايطير متايكلسش ديما لانطريمة ديما الحركة و المشي.

اوا من بعد ماضربو BMR ف (AMR(1,1 1,2 1,3 1,4 1,5 و تعرف شحال خاصك من سعرة حرارية فنهار غادي تبع معايا مزيان.

الى باغي تزيد فلوزن غادي تزيد 500 سعرة اضافية مثلا خاصك فنهار 2000 غاتولي 2500 و الى بغيتي تنقص الوزن غاتحيد منها 500 يعني الى نتا محتاج فنهار 2000 غاتحتاج 1500 باش تنقص لوزن الامر هكا داير بسيط عههه.

و كيفاش غانعرف انا الكمية ديال السعرات الحرارية لي غايخصوني فنهار؟

هنا غادي تعتامد على جوجل اي اكل باغي تاكلو ديرو فجوجل مثلا باغي تاكل روز غاتمشي دير فجوجل كم سعرة حرارية فالارز غالبا تايعطيو كل 100 غرام فيه القد و القد ديال السعرات و هكا غادير لكاع لماكلة لي كاتاكل فنهار.

امم منين غادي نبدا هاد العجب ؟؟

تبع معايا مزيان دب حيت هادشي مهم لي غادي نقول. كيما تاتعرفو اي حاجة باغي ديرها خاصك خطوة خطوة و منين تاتكون فشي حرب فماكاتبينش سلاح ديالك كامل دقة وحدة نفس الامر بالنسبة لانقاص او زيادة الوزن اذا تبعو معايا باش تفهمو

زيادة الوزن:

نتوما ا سيادنا قلنا غاتزيدو 500 سعرة و من بعد ماتستمر واحد زوج سيمانات عبر الوزن ديالك الى تزاديتي شويا واخا غي ميتين غرام راه مزيان كمل على هاد المنوال تايحبس الوزن ديالك مايبقاش باغي يزيد و ديك ساع غادوز لسلاح لاخر غاتزيد واحد. 100 سعرة اخرى و تشتمر واحد المدة تاتشوف الجسم ديالك كيفاش تجاوب و نتا غادي على هاد المنوال تاتوصل للوزن لي بغيتي.

نقصان الوزن:

نتوما ا سيادنا عندكم بزاف دلاسلحة و صراحة انك تنقص لوزن اسهل بكتير من انك تزيدو يله نبداو. اولا كيما قلنا غاتنقص 500 سعرة و ضروري ماتلوح واحد الكمية مهمة فلوزن فالشهر لول حيت غايكون غالبها ماء من بعد اتولي تلوح تقريبا نص كيلو تال كيلو فسيمانة راه مزيان استمر على هاد المنوال نفترضو وصلتي لواحد المرحلة لجسم ديالي مابغاش ينقص مزال هنا غادي تبدا دخل رياضة مرة فسيمانة و غاتشوف الجسم ديالك واش غايستاجب فلخر دسيمانة هادشي فالميزان فاش غاتشوفو طبعا و كمل هاكا وقتما داز لوقت و الميزان عندك وقف زيد حصة اخرى ديال الرياضة و نتا غادي و بهكا ميتين فلمية غاطيح كاع ديك شحمة لي عندك و تولي فحال الناس عههه.

نصائح مهمة:

بغيتك توجد ليا ميزان دلماكلة و تبقا تعبر ماكلتك و نسى عليا الماكلة مع مالين دار عول على واحد شهرين ولا تلت شهور ديال الخدمة و الهارد وورك هههه و عول انك غاتبقى طيب لراسك ماتيق لا فمك لا ختك لا عمتك ههه حيت هوما تايعرفو غي البنة و السكر عشرة لزيرو و الملحة لا علك ترضى يعني غاتولي طيب لراسك و غاتعتامد على المبخر و المصلوق و المشوي هنا غايتوضو اصحاب انقلص الوزن غايقولك انا راه ناكل لي بغيت اياه غادي تزيد بهاد الطريقة تا تاكل كلشي ولكن اتخرج على ضحتك تيق بيا و حنا باغيين نخدمو بلعقل و بالعلم خلي عليا وصفات جدا لنفخ الارداف العلم و المنطق ا حبيبي هو لي خدام ههه المهم حاجة اخرى كاينين تلاتة ديال العناصر غدائية مهمة خاص يتوفرو فلاكل ديالك البروتينات(اللحم الدجاج الحوت البيض الخليب العدس الفول الصوجا...) الكربوهيدرات المعقدة او السكريات المعقدة( البطاطا الارز الشعير القمح ...) و الدهون الصحية (زيت لعود اركان لوز كاوكاو كركاع...) و الفيتامينات و المعادن لي كاينين فلفواكه و الخضروات الخضراء (الخص المعدنوس الخيار السلاوي ....) و غاتبعد كليا على السكريات السريعة و المقليات و النشويات بكتر عند الحلوى و الفانيد و بيموات الكيتشوب الموناضة و دوك لعواصر ديال التعليب و اي حاجة ديال برة لا تم لا تعلم تاكل فدار و تصايب لوجبات ديالك و ديهم معاك سوا الخدمة سوا القرايا سوى لاي بلاصة بغيتي.

كلمة ختامية:

المهم هدا موضوع كبيير بزاف و متشعب و فيه بزاف مايتقال غادي نكتب حويجات اخرين مهمين لي غادي تستافدو منهم اكثر و اكتر حيت تانشوف طولت فيه بزاف و باقي لي بزاف مايتقال كل مرة غادي نبقى نكتب ليكم موضوع مفصل ولكن اصغر بكتير المهم نتمنى تكونو خديتو فكرة على الموضوع و اي تساؤل عندكم مرحبا حطوه ليا فتعليقات غانجاوب بكل سرور شكرا ليكم بزاف لمتابعة موقع أخبرني.