ما السر وراء رائحة التراب المبلل بالمطر؟؟

رائحة المطر!! رائحة التراب!!

الموضوع: اجي تفهم ديك ريحة ديال طراب من ورا متاطيح شتا منين تاتجي.

تقديم:

ها واحد السلام عليكم شباب كيف حالكم انشاء الله بيخير و بصحة و عافية مرحبا بيكم فموضوع جديد متابعي أخبرني ليوم موضوعنا غايديوي على ديك ريحة لي كلشي تايحماق عليها و تاتعجبو لي هي ريحة تراب من بعد مكاطيح شتا ديك رائحة لي ماكرهناش نشدوها و نديروها فلقراعي دريحة و نتريحو بيها ههه. و لا شك انك تسائلتي شي نهار منين جات ديك ريحة ؟ واش نيت ريحة التراب ولا ريحة الشتاء؟ منين تاتجي ديك ريحة يا ترى؟ و شنو نيت بصح تانشمو ؟ 

ما السر وراء رائحة التراب المبلل بالمطر؟؟

اشنو تانشمو بالضبط؟

كاينين خمسة ديال الحويجات اساسيين ربعة فالتربة و واحد فالسماء او الجو.

في التربة:

قبل ماندوي على هاد القضية كيف ديما انا تانستغل مواضيعي باش نوصل ليكم شي مفاهيم فعلوم الحياة (البيولوجيا) . بغيتكم تعرفو بلي هاد الارض الكائنات الحية ديالها مقسمين لخمسة ديال الاقسام اساسية كاينين لي تانشوفوهم بالعين المجردة و كاينين لي لا مانقدروش نشوفوهم الى بالمجهر. الحيوانات(المشاش لكلاب الفيل الحوت لعقرب دبان ناموس نملة قمل... و لائحة طويلة)، النباتات(الشجر الاعشاب الكازو هههه) هاد جوج فروع هادو تانشوفوهم و تانعرفوهم تقريبا مزيان، و كاينين الكائنات الدقيقة لي ماكايتشافو بالعين المجرد و هوما 3دالاقسام كاينين الفطريات؛ هوما ديك صوفة لي كاتشوفو فلخبز و الماكلة بصفة عامة منين تاتخسر (الغمولية) و خاصكم تعرفو بلي داكشي لي كاتشوفو فوق الخبز الغامل راه ملايين من الفطريات الا ما قلتش الملايير، و كاينين انواع هوما لي كايسببو لكزيما و العديد من الامراض الاخرى و كاين فيهم لي نافعين فحال لخميرة ديال الخبز لي كانستعملوها باش نخمرو لخبز و يجي منفوخ و لي هي عبارة عن فطريات كيما قلنا يعني من لخر كاينين فطريات مفيدة و فطريات خايبة ممرضة، و رابعين هوما الباكتيريات، و تا هوما كائنات دقيقة متاتبانش بالعين المجردة و تا هوما فيهم بزاف دنواع و كاين فيهم لي تاتنفعنا و كاين لي كا ضرنا، و فالاخير كاينين الفيروسات تا هوما كائنات مجهرية متايبانوش و هادو كلهم خطار على صحتنا، ولكن تا هوما كانستاعملو والديهم من بعد نقوليكم فين ههه، المهم لي بيغيتكم تعرفو هو ان البكتيريا و الفطريات و الفيروسات ماكايناش شي بلاصة فلعالم لي ماكاينينش فيها كاينين فالما فالتربة فالجو فالبحر فالبر فوق جلدك بين ظفارك فشعرك فنيفك فودنك فكلشي هههه ولكن عندك زهر ماعندهم منين يدخلو ولكن تايتسناو الغفلة باش يدخلو الغفلة هي شي جرحة مع يبان دم و سلات جاب الله الهمزة يدخلو ليك لجسمك يقصيو و هاديك هي لوليمة الا كنتي كاع صكع تلاقى مع شي فيروس مزعزع يخلي عشتك مزيان نتههههه المهم راه فينما كنتو كاينين الجراثيم(الفطريات،البكتيريات،الفيروسات).

اوا من بعد هاد درس لبسيط بزاف طبعا ندوزو دب لموضوعنا راه مزال كاع ما دخلنا فيه هههه المهم اسيدي و يا لالة فالتراب كاينين باكتيريات ياكو دوك و كاين واحد نوع تايتغدا على داك تفرتيت تاع نباتات شجر و الاوراق ليابسين و هاد نوع دلباكتيريا سميتو اكتينوميسيت(Actinomicyte) و هاد منين تاياكلو داك تفرتيت (مادة عضوية ) تايطلقو واحد المادة سميتها جيوسمين (geosmin) لي فيها واحد ريحة مميزة و زوينة بزاف ههههه شوفو الفضلات و البراز ديال هاد نوع من البكتيريا على مزينو هههه و هاي واحد من المواد لمشكلة لديك رائحة الفريدة.

تاتعرفو زيوت لي تانخرجوهم من نباتات زيت الخرواع زيت لعود زيت اركان زيت النخيل زيت زيت زيت ههه هادشي كامل تايخرج من النباتات غي الى شديتي شي ورقة ديال شجرة و قسمتيها غاتلقا فيها واحد ريحة اوا ا سيادنا تربة لي تاتكون فيها الاوراق ديال شجر و الاغصان ... زيوت ديالهم كايتجمعو فهاد تربة.

اوا منين كاطيح شتا و تاضرب فالارض كاطرش فحال لا شديتي نفاخة و ضربتيها مع الارض غادي يترش رذاذ ديالها فالجو نفس لبلان تايوقع منين كاطيح شتا و رذاذ ديال الماء كايهز معاه زيوت طبيعية غاتقولو ليا اش كاتخربق زيت متايتخلطش مع الما انقوليكم راه شوي دطراب و المعادن و جزيئات دقيقة ديال الطين تالصق فالما منين تايترش و زيوت نفس الشي. و من غير هاد زيوت كاين ديم المادة جيوسمين لي كايفرزوها الاكتينوميسيت كفضلات عقلتو عليها ههه المهم ها هوما زوج مواد و التالتين لي تا هوما فالتربة ، هوما المعادن (هوما داكشي لي تاتعرفو فحال لحديد نحاس دهب لفضة و كاينين لغرق ديال المعادن لي تايتستعملو فلحياة اليومية راه هوما لي معروفين) اوا ا سيادنا تا المعادن لي كاينين فالتربة فحال plomb, cadmium , arsenic .... والقائمة طويلة الى عمركم شميتو لفضة ولا ذهب ولا اي معدن راه تاتكون فيه واحد ريحة مميزة، الى عمركم شميتو شي شقفة خمسة ولا عشرة دراهم اتفهمو ننههههه المهم ما عليناش دب تقريبا تلاتة ديال الحويجات تايعطونا ديكا رائحة و نزيدكم وحدة واخا مابغيتش ندخلها ليكم على قبل ناس لي مادازوش فلبيو باش مايدوخوش مي انزيدها لي مافهمهاش يدوزها ههه دب شفتو دو البكتيريات لي دوينا عليهم منين تاتكون دنيا زاهية و الما و التغدية موجودة تايبقاو يتكاترو عادي باكتيريا كاتقسم على جوج و تكبر و تعاود تقسم و هي غادا هاكا ، اوا منين تايكون زلط تاتحول بعض الانواع دلباكتيريا لواحد شكل اخر عباره عن باكتيريا مكمشة فحالا قلتي تاتكمش و تاتسد على راسها فواحد الكيس (حويصلات ابواغ) spores هاد الحويصلات مقاويمين لجفاف و الميزيرية ههه تاتولي لقضية زاهية و ترجع البكتيريا كيف لول، المهم هاد الحويصلات صغارين كتر من البكتيريا فحد داتها، يعني البرد يديهم و تا ديك شتيوة لي كاتجي و رذاذ ديال الماء تايهزهم معاه فلجو و بما انهم عندهم واحد رائحة مميزة فتا هي داخلة فرائحة التراب او رائحة المطر لي داوين عليها.

في الجو:

المهم دوينا تقريبا على اهم العناصر لي فالتربة و تاتعطي ديك ريحة، و تا السماء او الجو تاتساهم بواحد العنصر و لي منين تاطيح شتا تاينزل تا هو فالجو مباشرة قبل اصلا ماطيح شتا راه كانشمو واحد ريحة جميلة فشكل هاديك اسيادنا هي ريحة الاوزون O3 هاد الاوزون هو واحد الغاز طبيعي سبحان الله مجموع و داير بالارض تايحميها من بزاف ظيال الاشعة الخطيرة لي جاية من شمس هو و مجموعة اخرى من الغازات طبعا لكن هاد الغاز هو الرئيسي و المهم في حماية كوكب الارض اوا اسيادنا اتكونو سمعتو بثقب الاوزون و بالاهمية ديالو الكبيرة اوا هداك هوا علاش داوي منين تايكون الجو ديال شتا تايهود شويا فيه مع الما و هو راه خو الاوكسيجينO2 غي زايد عليه شويا المهم المهم مادوخوش راسكم بزاف بشويا مع الوقت تولو طيرو فالعلوم باذن الله هههه.

كلمة ختامية:

اوا غانعطي فيها خلاصة خفيفة ظريفة ديك ريحة سبابها جيوسمين،الابواغ،زيوت النباتات،المعادن،و الاوزون . و تاتكون هاد ريحة قوية الى تعطلات شتا على ديك تربة مدة طويلة كايتجمعو دوك زيوت و دوك المواد لي قلنا مزيان و منين تاتجي شتيوا تاتشم ريحة واعرة بزاف. ملاحظة قبل مانسالي ماعرفتش واش شي واحد عمرو كان فشي حي صناعي منين تاطيح شتا فديك لبلاصة تاتكون خانزا اولا داك الما ديال شتا لي تايطيح تما مسخ مزيان (الامطار الحمضية) و ديك الارضية لي دايرة بالمصانع مسخة تا لباكتيريات تايموتو فيها مساكن، يعني ماكيان لا ريحة لا هم يحزنون هههه نتمنى يكون عجبكم الموضوع و ماتنساوش جيمات و البارطاج كتشجيع منكم و الى بغيتوني ندوي ليكم فشي موضوع لي عارف فيه غانقولو ولي ماعارفش غانقلب عليه و نكتبو ليكم بطريقتي المعهودة دمتم في امان الله يا اصدقاء.